Babalawen ni Yahweh ti Panagdaydayaw kadagiti Imahen

1 Nagsao tiApokaniak.

2 Kinunana, “Anak ti tao, kitaem dagiti bambantay ti Israel, ket ipakaammom kadakuada ti mensahek.

3 Ibagam kadagiti bambantay ti Israel a denggenda ti sao ti Apo aDios. Daytoy ti saok kadagiti bantay, turod, derraas ken tanap: Mangyegakto iti kampilan a mangdadael kadagiti luglugar a pagdaydayawan dagiti tattao kadagiti imahen.

4 Marbanto dagiti altar ket madadaelto dagiti pagpuoranyo iti insenso. Mapapatayto dagiti amin a tattao sadiay iti sangoanan dagiti imahenda.

5 Iwalangkonto ti bangkay dagiti Israelita; iwarawarakto dagiti tulangda iti lawlaw dagiti altar.

6 Marebbekto dagiti amin a siudad ti Israel. Iti kasta, madadaelto dagiti amin a lugar a pagdaydayawanda kadagiti imahen. Marumrumekto dagiti amin nga altar ken imahenda, maburakto dagiti pagpuoranda iti insenso, ket mapukawto dagiti amin nga inaramidda.

7 Mapapatayto dagiti tattao iti amin a lugar ket dagiti makalasat, bigbigendanto a siak ni Yahweh.

8 “Ilisikto iti pannakapapatay ti sumagmamano ket iwarawarakto ida kadagiti nasion a pagnaedandanto.

9 Sadiay, agbiagdanto a kas napagtalaw a balud. Malagipdakto ket maammoandanto a dinusak ken imbabainko ida,agsipud ta tinallikudandak ket ad-adda a kinayatda dagiti imahen ngem siak. Kaguradanto dagiti bagbagida gapu kadagiti dakes ken nakababain nga inaramidda.

10 Maammoandanto a siak ni Yahweh, ket saan nga ang-angaw dagiti ballaagko.”

11 Kuna ti Apo aDios, “Danogem ti imam, agtabbugaka ket agsangitka gapu iti amin a dakes ken makarimon nga aramid dagiti Israelita. Mataydanto iti gubat, bisin ken sakit.

12 Agsakit ken matayto dagiti adda iti adayo; ket dagiti adda iti asideg mataydanto iti gubat. Matayto iti bisin dagiti makalasat. Mariknadanto ti nakaro a pungtotko.

13 Maiwalangto dagiti bangkay iti ayan dagiti imahen ken iti lawlaw dagiti altar. Maiwarawaradanto pay kadagiti nangato a turod, iti tapaw dagiti bantay, iti sirok ti nalangto a kayo ken dadakkel a lugo, ken iti amin a lugar a nagpuoranda kadagiti daton nga agpaay kadagiti imahen. Iti kasta, maammoanton ti amin a tao a siak ni Yahweh.

14 Wen, dissoakto ida ket dadaelekto dagiti pagilianda. Paglangalangekto manipud iti disierto iti abagatan agingga iti siudad ti Ribla iti amianan, ket awanto ti labsak a lugar a pagnaedan dagiti Israelita. Ket maammoanton ti amin a tao a siak ni Yahweh.”