Dagiti Managbasol nga Agkabsat a Babbai
1 Nagsao tiApokaniak.
2 Kinunana, “Anak ti tao, adda idi agkabsat a babbai.
3 Idi ubbingda nga agnanaed idiay Egipto, napukawda ti kinabirhenda ket nagbalinda a balangkantis a babbai.
4 Ni Ohola ti inauna (isu ti Samaria), ket ni Oholiba ti adingna (isu ti Jerusalem). Inkallaysak ida a dua ket impasngayandak kadagiti annak.
5 Nupay asawak ni Ohola, intultuloyna latta ti kinabalangkantisna. Naderrep kadagiti kaayan-ayatna a taga-Asiria.
6 Mannakigubatda a naka-uniforme iti nangina a lupot, natatan-ok ken nangangatoda nga ofisiales ti armada. Natataerda amin nga agtutubo a turayen dagiti nagkabalio a soldado.
7 Inted ni Ohola ti bagina a kas balangkantis kadagiti nangato a tattao iti Asiria, ket tinulawanna ti bagina babaen iti panagdaydayawna kadagiti didiosen dagiti nangibukbokanna iti kinaderrepna.
8 Dina insardeng ti panagbalangkantisna nga inrugina manipud iti panagnaedna idiay Egipto. Idi panawen ti kinabalasitangna, kinakaiddan dagiti lallaki a nangarusibsib iti kinalasbangna.
9 Isut’ gapuna a binay-ak iti ima dagiti kaayan-ayatna a taga-Asiria a nagderrepanna iti kasta unay.
10 Linabusanda, innalada dagiti annakna sada pinatay iti kampilan. Ket sarsaritaen dagiti babbai iti amin a lugar ti nagbanaganna.
11 “Nakita daytoy ni Oholiba, ngem narukrukop ken nakarkaro ti kinabalangkantisna ngem ni manangna nga Ohola.
12 Naderrep met kadagiti natatan-ok ken ofisiales a taga-Asiria ken dagiti mannakigubat a nagkawes kadagiti narangrang nga uniporme. Natataerda nga agtutubo nga ofisiales ti armada.
13 Nakitak a balangkantis a namimpinsan ni Oholiba ket dakes a kas ken ni manangna.
14-15 “Kimmaro a kimmaro ti kinabalangkantis ni Oholiba. Nagargari kadagiti ladawan dagiti nangato nga ofisiales ti Babilonia a naikitikit kadagiti bakud ken napintaan iti makapurar a nalabaga. Naputipotan dagiti siketda ket adda napintas a turban kadagiti uloda.
16 Apaman a nakitana dagiti ladawan, rimmugso ti riknana ket nangibaon kadagiti mangayab kadakuada idiay Babilonia.
17 Immay dagiti taga-Babilonia tapno kaiddaenda. Kinaidda ken tinulawanda agingga a nauma kadakuada.
18 Impakitana ti bagina a lamolamo ket binay-anna a maammoan ti amin ti kinabalangkantisna. Naumaak kenkuana a kas iti pannakaumak ken ni manangna.
19 Nailumlom iti kinabalangkantisna ket inulitna dagiti aramidna a kas balangkantis idi balasitang pay idiay Egipto.
20 Nagargari kadagiti lallaki a dadakkel ti mabagbagida a kas iti mabagbagi ti kabalio ken kasla kabalio ti panagparuarda.”
21 (Oholiba, kayatmo nga aramiden manen ti kinabalangkantismo idi addaka idiay Egipto, idi impalubosmo nga abalbalayen dagiti lallaki dagiti susom ket napukawmo ti kinabirhenmo.)
Ukomen ti Dios ni Oholiba
22 “Ita, Oholiba, siak nga Apo aDios, kastoy ti kunak kenka. Naumakan kadagitoy a kaayan-ayatmo, ngem pagpungtotekto ida ket yegko ida a manglawlaw kenka.
23 Yegkonto amin a taga-Babilonia ken Caldeo, dagiti lallaki a taga-Pekod, Soa ken Koa agraman dagiti amin a taga-Asiria. Ummongek amin dagita natataer ken agtutubo nga ofisiales, amin a natan-ok ken nangato nga ofisiales ti armada.
24 Aggapudanto iti amianan a mangdarup kenka. Ikuyogdanto ti adu a soldado agraman dagiti lugan a pakigubat ken dagiti lugan nga agkarga kadagiti masapulda. Sikakalasag ken nakahelmetdanto a manglakub kenka. Yawatkanto kadakuada, ket ukomendakanto kas mayannurot kadagiti lintegda.
25 Gapu ta kapungtotka, palubosakto ida a mangaramid iti kaykayatda kenka gapu iti pungtotda. Isinadanto ti agong ken dagiti lapayagmo ket patayendanto dagiti annakmo. Wen, alaendanto ida, ket puorandanto ida a sibibiag.
26 Ray-abendanto dagiti pagan-anaymo, ket alaendanto dagiti alahasmo.
27 Pasardengekto ti kinaderrepmo ken dagiti naalas nga inar-aramidmo manipud idi addaka idiay Egipto. Dimonton kitaen dagiti imahen wenno malagipen ti Egipto.”
28 Kastoy ti kuna ti Apo aDios, “Yawatkanto kadagiti tattao a kagurguram ken nauman kenka.
29 Gapu ta kaguradaka, alaendanto ti amin a nagbannogam, ket panawandakanto a lamolamo. Malukaisanto ti kinabalangkantismo. Ti kinaderrep ken ti kinabalangkantismo
30 ti nangyeg iti kastoy a kasasaadmo. Balangkantiska a kinaidda dagiti nasion, ket tinulawam ti bagim babaen iti panagdaydayawmo kadagiti didiosenda.
31 Tinuladmo ti aramid ni kabsatmo. Ngarud, yegkonto ti dusa kenka a kas iti dusa a sinagabana.”
32 Kuna ti Apo aDios,
“Uminumkanto iti kopa ni kabsatmo,
kopa a dakkel ken nauneg ti lansadna.
Napno dayta a kopa
ket lalaisen ken umsiendakanto ti amin.
33 Agdiwerdiwerkanto kas iti nabartek;
kopa ti panagbuteng ken pannakadadael,
ti kopa ni kabsatmo a Samaria.
34 Arub-obemto ti amin agraman arinsaedna,
ket ibarsakmonto ti kopa.
Sugatsugatemto ti barukongmo
babaen kadagiti ribakna.
Mapasamakto amin dagitoy.
Ta daytoy ti sao ti Apo aDios.”
35 Kastoy ti kuna ti Apo aDios, “Agsipud ta linipatan ken tinallikudannak, sagabaemto ti dusa ti kinaderrepmo ken ti kinabalangkantismo.”
Maukom dagiti Agkabsat
36 Kinuna tiApokaniak, “Anak ti tao, sisasaganaka kadi a mangukom kada Ohola ken Oholiba? Idarummo ida gapu kadagiti nakaal-alas nga inar-aramidda.
37 Nakikamalala ken nagpapatayda. Nakikamalalada kadagiti didiosenda. Pinatayda dagiti annakko nga impasngayda. Pinuoranda dagiti annakko a kas daton kadagiti didiosenda.
38 Saan la a dayta. Tinulawanda ti Templok, ket saanda a nginilin ti intuyangko nga Aldaw a Panaginana.
39 Iti dayta nga aldaw a panangpapatayda kadagiti annakko a kas daton kadagiti didiosen, immayda iti Templok ket tinulawanda!
40 “Masansan a mangibaonda kadagiti mapan mangawis kadagiti lallaki nga adda iti adayo ket umay dagiti lallaki. Agdigos dagiti agkabsat a babbai, pintaanda ti matada ket isuotda dagiti alahasda.
41 Agtugawda iti nalamuyot a pagiddaan. Iti lamisaan iti sangoda, ikabilda dagiti insenso ken lana ti olibo nga intedko kadakuada.
42 Mangngeg ti ariwawa ti nalang-ay a bunggoy dagiti tattao nga aggapu iti let-ang. Pulserasanda dagiti babbai ken balangatanda ida kadagiti agkakapintas a korona.
43 Iti kasta, kinunak iti bagik nga us-usarenda a kas balangkantis ti maysa a babai a bimmaket a nakikamkamalala.
44 Inulit-ulitda ti napan kadagitoy a babbai a balangkantis. Napnapanda kada Ohola ken Oholiba, dagita dakes a babbai.
45 Maidarumdanto iti pannakikamalala ken pammapatay ket sentensiaanto ida dagiti nalinteg a lallaki. Ngamin, mannakikamalalada ken mammapatayda.”
46 Kastoy ti kuna ti Apo aDios, “Mangyegka iti bunggoy a mangriribuk kadakuada ken mangsamsam kadagiti sanikuada.
47 Bay-am ti bunggoy a mangubor ken mangrangrangkay kadakuada, mangpapatay kadagiti annakda ken mangpuor kadagiti balbalayda.
48 Pagsardengekto ti immoralidad iti entero a daga a pakaballaagan dagiti amin a babbai tapno dida makikamalala kas kadagiti agkabsat.
49 Ket dakayo nga agkabsat, agsagabakayto gapu iti kinaderrepyo ken ikaroyonto ti basolyo gapu iti panagdaydayawyo kadagiti imahen. Iti kasta, maammoanyonto a siak ti Apo aDios.”