Ti Padaya ni Belsazar
1 Iti maysa a rabii, inawis ni Ari Belsazar ti sangaribu nga ofisialesna a dumar-ay iti dakkel a padaya, ket nagiinumda iti arak.
2 Idi agiinumda, pinaala ni Belsazar dagiti alikamen a balitok ken pirak a sinamsam ni tatangnaa Nebucadnesar iti Templo idiay Jerusalem. Pinaalana ida tapno paginumanda kadagiti ofisialesna, dagiti assawa ken kamalalana.
3 Dagus a naipan dagiti alikamen a balitok ken pirak, ket naginumanda,
4 bayat ti panagdaydayawda kadagiti didiosen a naaramid iti balitok, pirak, bronse, landok, kayo ken bato.
5 Pagammoan, nagparang ti ima ti maysa a tao ket nagsurat iti napalitadaan a diding ti palasio, iti lugar a maraniagan unay ti silaw. Nakita ti ari ti ima nga agsursurat.
6 Bimsag gapu iti kasta unay a butengna, ket uray la nagkutokot dagiti tumengna.
7 Iti napigsa a timek, pinaayabanna dagiti salamangkero, dagiti mammadles ken dagiti astrologo. Idi dumtengda, kinuna ti ari kadakuada, “Ikkak iti pammadayaw ti siasinoman a makabasa iti naisurat ken makailawlawag iti kayatna a sawen. Makawesanto iti napateg a lupot a nalabaga, maukkoranto iti kuentas a balitok ken maisaadto a maikatlo a kangatoan nga agturay iti pagarian.”
8 Immasideg dagiti mammagbaga iti ari ngem awan makabasa iti naisurat wenno makaibaga iti ari iti kaipapananna.
9 Gapu iti daytoy, immad-adda manen ti bessag ken danag ni Ari Belsazar. Saan nga ammo dagiti ofisialesna ti aramidenda.
10 Nangngeg ti reyna nga ina ni Belsazar ti panagsasarita ti ari ken dagiti ofisialesna, ket simrek iti kuarto a pagrarambakanda. Kinunana, “Manayon koma ti panagbiag ti ari! Dika koma agdanag ken bumsag.
11 Adda lalaki ditoy pagariam a naparaburan iti espiritu dagiti nasantoan a didiosen.Idi ni tatangmoti ari, impakita daytoy a tao a naparaburan iti nasayaat a pannakaawat, pannakaammo ken sirib a kas iti sirib dagiti didiosen. Daytoy ti gapuna a dinutokan idi ni Ari Nebucadnesar a tatangmo a mangipangulo kadagiti mammadles, salamangkero, mammuyon ken astrologo.
12 Adda naisangsangayan a kabaelanna ket masirib. Nalaing a mangibaga iti kaipapanan ti tagtagainep, mangipalawag kadagiti burburtia ken mangilawlawag kadagiti palimed. Paayabam ngarud daytoy a tao, ni Daniel (a pinanaganan ti ari iti Beltesazar) ket paipalawagmo kenkuana ti kaipapan amin dagitoy.”
Ipalawag ni Daniel ti Naisurat
13 Dagus a naidatag ni Daniel iti sangoanan ti ari. Kinuna ti ari, “Sika kadi ni Daniel a maysa kadagiti Judio a napagtalaw nga innala ni amak idiay Juda?
14 Nadamagko nga adda kenka ti espiritu dagiti didiosen ket nalaingka, addaanka iti pannakaawat ken sirib.
15 Naayaban dagiti mammagbaga ken salamangkero tapno basaen ken ibagada ti kayat a sawen ti naisurat ngem dida naibaga ti kaipapananna.
16 Ita adda agkuna a kabaelam nga ibaga dagiti nailemmeng a kaipapanan ken ammom nga ilawlawag dagiti palimed. No mabasam ti naisurat ket ibagam kaniak ti kaipapananna, ikkanka iti pammadayaw. Makawesankanto iti napateg a lupot a nalabaga, makuentasankanto iti balitok ken maisaadkanto a maikatlo a kangatoan iti turay iti pagarian.”
17 Insungbat ni Daniel iti ari, “Saandak nga ikkan iti sagut, Natan-ok nga Ari, wenno itedmo laengen iti sabali ti gunggona nga itedmo. Basaek ti naisurat ket ilawlawagko kenka ti kaipapananna.
18 “Pinagbalin ti Kangatoan a Dios ni tatangmo a Nebucadnesar a naindaklan nga ari. Inikkanna iti tan-ok ken dayag.
19 Gapu iti nagpaiduma a pannakabalinna, nagbuteng ken nagtigerger iti sangoananna dagiti amin a tattao ti nadumaduma a puli ken pagsasao. Pinapatayna dagiti kayatna a mapapatay ket inispalna dagiti kayatna a maispal. Intan-okna dagiti kayatna nga itan-ok ket impababana dagiti kayatna nga ipababa.
20 Ngem gapu ta nagbalin a natangsit, napalangguad ken naranggas, naikkat a kas ari ket napukawna ti nadayag a saadna.
21 Napagtalaw iti gimong dagiti tattao. Nagbalin ti panunotna a kas iti panunot ti animal. Nakipagtaeng kadagiti atap nga asno. Nangan iti ruot a kas iti baka. Naturog iti ruar ket nalinlinnaawan. Kamaudianna, binigbigna nga iturayan ti Kangatoan a Dios ti amin a pagarian dagiti tattao, ket isaadna nga ari ti siasinoman a pilienna.
22 “Ngem sika nga anakna, dika nagpakumbaba nupay ammom amin dagitoy.
23 Nagaramidka iti maibusor iti Apo ti langit ket innalam dagiti tasa ken malukong iti Templona. Inusarmo ida a naginumam iti arak a kaduam dagiti ofisialesmo, dagiti assawam ken dagiti kamalalam. Nagdaydayawkayo kadagiti didiosen a naaramid iti balitok, pirak, bronse, landok, kayo ken bato, didiosen a di makakita wenno makangngeg ken awan ammona. Ngem dimo pinadayawan ti Dios a mangtengtengngel iti biagmo ken iti amin nga aramidmo.
24 Daytoy ti gapuna nga imbaon ti Dios ti ima a nangisurat kadagitoy a sao.
25 “Dagitoy ti naisurat:‘Mene, mene, tekel, parsin.’
26 Ket kastoy ti kaipapananna:mene, nabilangen ti Dios dagiti aldaw a panagpaut ti pagariam ket inkeddengnan a gibusan.
27 Tekel, natimbangkan ket nasarakan a kurang ti dagsenmo.
28 Parsin, nabingayen ti pagariam ket naited kadagiti taga-Medo ken taga-Persia.”
29 Imbilin a dagus ni Belsazar a maikkan ni Daniel iti pammadayaw. Nakawesan iti napateg a lupot a nalabaga, naukkoran iti kuentas a balitok ket naisaad a maikatlo a kangatoan iti turay iti pagarian.
30 Iti dayta met la a rabii, napapatay ni Belsazar nga ari ti Babilonia.
31 Inagaw ni Dario a taga-Media ti pagarian. (Agtawen idi ni Dario iti 62.)