Ikari ni Yahweh a Mabangon manen ti Jerusalem
1 Inted ni Yahweh a Mannakabalin-amin daytoy a mensahe ken ni Zacarias:
2 “Tinarigagayak a tulongan ti Jerusalem gapu iti nasged nga ayatko kadagiti tattaona. Gapu iti ayatko, kinapungtotko dagiti kabusorna.
3 Agsubliak iti Jerusalem, ti nasantoan a siudadko, ket agnaedak sadiay. Maawaganto iti napudno a siudad. Maawaganto met ti bantay ni Yahweh a Mannakabalin-amin iti nasantoan a bantay.
4 Agtugawto manen dagiti babbaket ken lallakay kadagiti kalsada ken plasa ti Jerusalem. Agsarukoddanto a magna gapu iti kinalakay ken kinabaketda.
5 Mapnonto manen dagiti kalsada ti siudad kadagiti agaayam nga ubbing.
6 “Mabalin nga ipagarup dagiti nasion a nabati a saan a maaramid daytoy ngem nalaka la a banag daytoy kaniak.
7 Isalakankonto dagiti tattaok kadagiti pagilian a nakaipananda.
8 Alaekto ida manipud iti daya ken laud ket isublikto ida idiay Jerusalem a pagnaedanda. Isudanto dagiti tattaok ket siakto ti Diosda. Iturayakto ida a sipupudno ken awan idumdumak.
9 “Pakirdenyo ti pakinakemyo, dakayo a tattao. Dagiti mangmangngegyo ita, isu met laeng ti insasao dagiti profeta idi maisaad dagiti fondasion tapno mabangon manen ti Templok.
10 Sakbay dayta a tiempo, awan ti makabael a mangtangdan iti tao wenno animal. Mabuteng dagiti tattao a rummuar gapu kadagiti kabusorda. Pinagbibinnusorko dagiti amin a tattao.
11 Ngem ita, maiduma ti pannakilangenko kadagiti nakalasat a tattao iti daytoy a pagilian.
12 Awanto ti kabutengda no agmulada. Agbunganto dagiti ubasda. Adunto ti maapit iti daga. Nawadwadto ti tudo. Ipaaykonto amin dagitoy a bendision kadagiti tattao a nakalasat iti nasionko.
13 Tattao ti Juda ken Israel, iti napalabas, no ilunod dagiti ganggannaet dagiti padada, kunada, ‘Agdissuor koma kadakayo ti isu met la a didigra a nagdissuor iti Juda ken Israel.’ Ngem isalakankayto ket kunanto dagita a ganggannaet iti tunggal maysa, ‘Sapay koma ta mabendisionankayo a kas iti Juda ken Israel.’ Bumilegkayo ngarud ket dikay agbuteng.”
14 Kuna ni Yahweh a Mannakabalin-amin, “Idi pinagpungtotdak dagidi kapuonanyo, inkeddengko nga idissuor kadakuada ti didigra ket diak nagbabawi no di ket inaramidko dagiti panggepko.
15 Ngem ita, panggepko a bendisionan dagiti tattao ti Jerusalem ken Juda. Dikayo ngarud agbuteng.
16 Dagitoyti masapul nga aramidenyo: Agsaokayo iti pudno iti padayo a tao. Kadagiti pangukoman, ipakatyo ti hustisia, ti hustisia a mangyeg iti kappia.
17 Dikay agpanggep iti dakes iti padayo a tao. Dikay agsaksi iti ulbod. Kagurak ti kinaulbod, kinakillo ken kinaranggas.”
18 Impakaammo ni Yahweh a Mannakabalin-amin ken ni Zacarias daytoy a mensahe:
19 “Ti panagayunaryo kadagiti maikapat, maikalima, maikapito ken maikasangapulo a bulan, agbalinto a narambak ken naragsak a fiesta dagiti tattao ti Juda. Masapul nga ayatenyo ti kinapudno ken kappia!”
20 Kuna ni Yahweh a Mannakabalin-amin, “Dumtengen ti tiempo nga umay iti Jerusalem dagiti tattao nga aggapu kadagiti dadakkel a pagilian ken siudad.
21 Kunanto dagiti tattao iti maysa a siudad kadagiti agnaed iti sabali a siudad, ‘Inkam agdaydayaw iti Apo a Mannakabalin-amin ken agdawat iti bendisionna. Umaykayo met!’
22 Dadakkel ken nabibileg a nasion ti mapanto idiay Jerusalem tapno agdaydayawda ken ni Yahweh a Mannakabalin-amin ken agdawatda iti bendisionna.
23 Kadagita nga aldaw, sangapulo a ganggannaet ti mapan iti maysa a Judio ket kunada, ‘Kayatmi ti sumurot kenka ta nadamagmi nga adda kenka ti Dios.’”