Ilawlawag ni Jose dagiti Tagtagainep dagiti Balud
1 Iti saan a mabayag, adda saan a nasayaat nga inaramid dagiti dua a babaonen ti ari ti Egipto, isuda nga agiserserbi iti arak ken ti pangulo a panadero iti apoda nga ari ti Egipto.
2 Nakapungtot ti Faraon kadagitoy dua nga ofisiales
3 ket pinaipupokna iti balay dagiti guardia. Ditoy met laeng ti nakaipupokan ni Jose.
4 Ni Jose ti dinutokan ti kapitan a mangasikaso kadagiti kasapulanda ket nabayag a nagtalinaedda sadiay.
5 Iti maysa a rabii, iti uneg ti pagbaludan, nagtagtagainep dagitoy dua nga ofisiales. Agduma ti kaipapanan ti tagtagainepda.
6 Kabigatanna, idi mapan agserbi kadakuada ni Jose, nadlawna nga adda pakariribukanda
7 ket dinamagna no ania ti pakadanaganda.
8 “Ammom,” kinunada. “Adda natagtagainepmi idi rabii ngem awan man la ditoy ti makailawlawag iti kaipapanan dagitoy.”
Kinunana ni Jose, “Ti Dios laeng ti makailawlawag iti kaipapanan dagiti tagtagainep. Ibagayo kaniak dagiti tagtagainepyo.”
9 Sinarita ngarud ti para-serbi iti arak ti tagtagainepna, “Adda kampay idi sangapuon nga ubas iti sangoanak.
10 Tallo ti sangana. Apaman a nagbulong, nagbusel ket dagus metten a nagluom dagiti bungana.
11 Ig-iggamak idi ti baso ti ari, isu a pinurosko dagiti ubas ket pinespesko ida iti baso sako inted iti Faraon.”
12 Kinuna ni Jose, “Kastoy ti kaipapanan ti tagtagainep: Tallo nga aldaw ti kayat a sawen dagiti tallo a sanga.
13 Tallo nga aldaw manipud ita, wayawayaannaka ti ari, pakawanennaka, ket isublinaka iti sigud a saadmo. Sikanto ti para yawat iti basona a kas iti ar-aramidem idi.
14 Ngem pangngaasim ta laglagipennak inton nasayaaten ti kasasaadmo. Isarsaritanakto koma iti ari, ket tulongannak a rummuar iti daytoy a pagbaludan.
15 Kinapudnona, naitalawak iti daga dagiti Hebreo, ket uray ita nga addaak ditoy Egipto, awan ti ammok a naaramidko a nakaibaludak.”
16 Idi makita ti pangulo a panadero a naimbag ti kaipapanan ti tagtagainep ti pangulo dagiti agserserbi iti arak, kinunana ken ni Jose, “Nagtagtagainepak met. Nakasusuonak kampay idi iti tallo a basket ti tinapay.
17 Iti akingngato a basket, adda amin a kita ti tinapay a maipaay iti ari, ngem tuktoktoken ida dagiti tumatayab.”
18 Kinuna ni Jose, “Kastoy ti kaipapanan ti tagtagainep: Tallo nga aldaw ti kayat a sawen ti tallo a basket.
19 Tallo nga aldaw manipud ita, wayawayaannakanto ti ari sanakanto paputolan. Paibitinnanto ti bangkaymo iti kayo ket tuktoktokento dagiti tumatayab.”
20 Kasangay ti ari iti maikatlo nga aldaw, ket nangipaay iti maysa a padaya para kadagiti amin nga ofisialesna. Winayawayaanna ti agiserserbi iti arak ken ti pangulo a panadero, ket indatagna ida kadagiti ofisialesna.
21 Insublina ti agiserserbi iti arak iti sigud a trabahona,
22 idinto a pinabitayna ti pangulo a panadero. Napasamak amin nga imbaga ni Jose.
23 Ngem saan a nalagip ti agiserserbi iti arak ni Jose. Nalipatanna a namimpinsan ni Jose.