Ti Nabaknang a Daga a Tagikuaen dagiti Israelita
1 “Tungpalenyo a sipapasnek ti amin a bilinko kadakayo ita nga aldaw tapno umatiddog ti biagyo, umadukayo ken sakupenyo ti daga nga inkari tiApokadagidi kapuonanyo.
2 Lagipenyo ti panangidalan tiApoa Diosyo kadakayo iti nabayag a panagdaliasatyo iti let-ang iti uneg ti 40 a tawen. Sinuotnakayo tapno maammoanna no ania ti adda iti pusoyo ken no tungpalenyo dagiti bilinna.
3 Pinagbisinnakayo,sanakayo met la inikkan iti mana, maysa a taraon a diyo pay naramramanan uray dagidi kapuonanyo. Inaramidna daytoy tapno masursuroyo a saan la a tinapay ti pagbiag ti tao no di pay ket dagiti amin a sao ti Dios.
4 Iti uneg ti 40 a tawen, saan a narunot dagiti pagan-anayyo wenno limteg dagiti dapanyo.
5 Laglagipenyo a disiplinaennakayo tiApoa Diosyo a kas iti panangdisiplina ti ama iti anakna.
6 Tungpalenyo dagiti bilin tiApo: agbiagkayo a kas mayannurot kadagiti lintegna ken agbutengkayo kenkuana.
7 Ipannakayo tiApoa Diosyo iti nadam-eg a daga—maysa a daga nga addaan kadagiti karayan ken ubbog ken burayok nga agayus kadagiti tanap ken turod.
8 Nawadwad ti daga iti trigo ken sebada, ubas, igos, granada, olibo ken diro.
9 Sadiay, dikayto agbisin ket addanto amin a masapulyo. Pagminasan iti pirak ken gambang dagiti turodna.
10 Addanto amin a kayatyo a kanen, ket agyamankayto itiApoa Diosyo gapu iti nadam-eg a daga nga intedna kadakayo.”
Ballaag maipapan iti Pananglipat ken ni Yahweh
11 “Diyolipaten tiApoa Diosyo; tungpalenyo dagiti amin a lintegna nga intedko kadakayo ita nga aldaw.
12 Inton narang-ayen ti panagbiagyo, inton agnaedkayon kadagiti napipintas a balay,
13 inton adun dagiti baka ken karneroyo, pirak ken balitokyo, ket adun ti sanikuayo,
14 saankayo nga agpalangguad. Diyo lipaten tiApoa Diosyo a nangispal kadakayo idiay Egipto a nakatagabuanyo.
15 Indalannakayo iti dayta nalawa ken nakabutbuteng a let-ang nga umok dagiti nagita nga uleg ken manggagama. Natikag ken awan danum ti daga, ngem pinagpussuakna ti dakkel a bato tapno adda danum nga inumenyo.
16 Iti let-ang, tinaraonannakayo iti mana, maysa a kita ti taraon a dipay naramramanan dagidi kapuonanyo. Pinagsagabanakayo tapno suotennakayo, ket iti kasta, iti kamaudianna, paraburannakayo iti agkakaimbag a banag.
17 Ngarud, diyo ipagarup a bimmaknangkayo iti bukodyo a pannakabalin.
18 Laglagipenyo a tiApoa Diosyo ti mangted kadakayo iti bileg tapno bumaknangkayo. Aramidenna daytoy gapu ta napudno pay laeng agpapan ita iti nakitulaganna kadagidi kapuonanyo.
19 No lipatenyo tiApoa Diosyo, ket agdaydayaw ken agserbikayo kadagiti sabali a didiosen, ballaagankayo ita nga aldaw nga awan duadua a madadaelkayto.
20 No sukirenyo tiApo, madadaelkayto a kas kadagita a nasion a dadaelennanto bayat ti isusungadyo.”