Mangibaon ni Josue kadagiti Espia idiay Jerico

1 Manipuditi Settim, nangibaon ni Josue iti dua nga espia ket binilinna ida a sukimatenda ti daga ti Canaan iti nalimed, nangruna ti Jerico. Idi dimtengda sadiay, napanda immian iti balay ti maysa a balangkantis a babai nga agnagan iti Rahab.

2 Naipadamag iti ari ti Jerico nga adda sumagmamano nga Israelita a dimteng iti dayta a rabii tapno agsiimda iti pagilian.

3 Pinaibaga ti ari ken ni Rahab: “Iruarmo dagiti lallaki nga adda iti balaymo ta naibaonda a mangsukimat iti pagilian.”

4 Ngem nailemmengen ni Rahab dagiti dua ket insungbatna, “Agpayso nga adda lallaki nga immay iti balayko ngem diak ammo ti naggapuanda.

5 Pimmanawda itay sumipnget sakbay a mairikep ti ruangan ti siudad. Diak ammo ti papananda ngem no agdardaraskayo a mangkamakam kadakuada, matiliwyo ida.” (

6 Impanna dagiti espia iti tuktok ti balay ket naglemmengda kadagiti palatang ti lino nga inyulina sadiay.)

7 Apaman a nakapanaw dagiti soldado ti ari, narikpan ti ruangan ti siudad. Napanda binirbirok dagiti Israelita nga espia agingga iti pagballasiwan ti Jordan.

8 Sakbay a naturog dagiti lallaki, napan ni Rahab iti tuktok ti balay

9 ket kinunana kadakuada: “Ammok nga inted tiApodaytoy a daga kadakayo; ket mabuteng amin a tattao iti pagilian kadakayo.

10 Nadamagmia pinagmagana ti Nalabaga a Baybay iti sangoananyo idi rummuarkay idiay Egipto. Nadamagmi ti panangpapatayyo kadagiti dua nga ari dagiti Amorreo iti dayaen ti Jordan, da Sihon ken Og.

11 Nagbutengkami apaman a nadamagmi daytoy; gapu kadakayo timmakrot dagiti amin a tattao. TiApoa Diosyo isu ti Dios ti langit ken ti daga.

12 Ita, agsipud ta kinaasiankayo, isapatayo itiApoa kaasianyonto met ti familiak. Ikkandak iti pakakitaan a mapagtalkankayo.

13 Ikariyo nga ispalenyonto ti biag dagiti nagannak kaniak, dagiti kakabsatko ken amin a familiada!”

14 Kinuna dagiti lallaki, “Sisasaganakami a matay a mangsalaknib kadakayo. No dinakami la ket ipulpulong, nasayaatto ti panangtratomi kadakayo ket tungpalenminto ti karimi inton ited tiApoti daga kadakami.”

15 Agnaed ni Rahab iti balay a nabangon iti bakud ti siudad, ket pinababana dagiti lallaki iti tawa babaen iti tali.

16 Imbagana kadakuada, “Inkay agkamang iti bantay tapno didakayo mabirokan dagiti soldado ti ari. Aglemmengkayo sadiay iti tallo nga aldaw; sakayto la agawid inton agsublida.”

17 “Tungpalenminto ti kari a pinasapataam kadakami,” kinuna kenkuana dagiti lallaki.

18 “Kastoyto ti aramidem: Inton sakupenmi ti pagilianyo, igalutmonto dayta nalabaga a tali iti tawa a bimmabaanmi. Ummongemto dagiti nagannak kenka, dagiti kakabsatmo ken amin a familia ni tatangmo iti balaymo.

19 No adda rummuar iti balay, isunto ti akimbasol iti ipapatayna. Ngem no addanto madangran iti uneg ti balay, dakami ti akimbasol.

20 Ngem no ipulongmo ti ar-aramidenmi, saanton a nasken a tungpalenmi ti karimi.”

21 Immanamong ni Rahab, ket pinalubosanna ida. Idi nakapanawdan, inggalutna ti nalabaga a tali iti tawa.

22 Napan dagiti espia iti bantay, ket tallo nga aldaw a naglemmengda sadiay. Sinursor dagiti soldado ti ari ti tay-ak a nangbirbirok kadakuada. Idi dida masarakan ida, nagsublida idiay Jerico.

23 Simmalog dagiti espia iti bantay. Binallasiwda ti karayan ket nagsublida ken ni Josue. Imbagada kenkuana ti amin a napasamak,

24 “Awan duadua nga inteden tiApoti entero a pagilian kadatayo,” kinunada kenkuana. “Mabuteng dagiti amin a tattao sadiay kadatayo.”