Ti Palasio ni Solomon
1 Nangaramid met ni Solomon iti palasio a pagnaedanna ket 13 a tawen sa nalpas.
2-3 Kastoy ti rukod ti Salas a maawagan iti Bakir ti Libano: 150 a kadapan ti kaatiddogna, 75 a kadapan ti kaakabana ken 45 a kadapan ti kangatona. Adda talloa binnatog nga adigi a sedro ket naiparabaw kadagitoy dagiti awanan a sedro. Sangapulo ket lima nga adigi iti tunggal binnatog. Sedro met ti bobeda ket dumanon kadagiti kuarto a pagidulinan a naisaad kadagiti adigi.
4 Iti agsumbangir a diding, adda tallo a batog a tawa iti tallo a tukad.
5 Rektanggulo ti bastidor dagiti tawaken ridaw. Dagiti tallo a binnatog a tawa iti maysa a bakud agsisinnangoda kadagiti adda iti bangir a diding.
6 Pitopulo ket lima a kadapan ti kaatiddog ti salas a maawagan iti Salas dagiti Adigi ket 45 a kadapan ti kaakabana. Adda nalinongan a beranda a naisaad kadagiti adigi.
7 Nakalupkopan iti sedro ti Salas ti Trono, manipud datar agingga kadagiti pasag.Maaw-awagan pay daytoy a kuarto iti Salas a Pangukoman a pangrisutan ni Solomon kadagiti maidatag a kaso.
8 Naaramidti pagtaengan ni Solomon iti sabali a paraangan iti likudan ti Salas a Pangukoman. Umasping kadagiti dadduma a patakder. Kasta ti binangonna a pagnaedan ti asawana nga anak ti Faraon nga ari ti Egipto.
9 Naaramid amin dagitoy a patakder, manipud kadagiti fondasion agingga kadagiti sagumaymayda, kadagiti bato a naisagana iti pagtikapan iti bato. Natikapan dagitoy a bato kas mayannurot iti rukodda ket naragadi ti akin-uneg ken akinruar a bangirda.
10 Naaramid dagiti fondasion iti dadakkel a bato a naisagana iti pagtikapan iti bato; adda dagiti bato a 15 a kadapan ket adda met dagiti agrukod iti 12 a kadapan.
11 Naparabawan dagiti fondasion iti batbato ken kayo a sedro.
12 Nadidingan ti paraangan ti palasio, ti akin-uneg a paraangan ti Templo, ken ti kuarto iti pagserkan ti Templo. Naaramid dagiti diding kadagiti sedro ken batbato. Naibaet ti katuon a sedro iti tunggal tallo a katuon a batbato.
Ti Trabaho ni Hiram
13 Pinaayaban ni Ari Solomon ti maysa a tao nga agnagan iti Hiram nga agnaed iti siudad ti Tiro. Nalaing nga agpanday kadagiti alikamen a bronse.
14 Taga-Tiro ni amana a mammanday met iti bronse idi sibibiag pay. Nagtaud iti tribu ti Neftali ti ina ni Hiram. Masirib ken adun ti padas ni Hiram a kas mammanday. Inawatna ti awis ni Ari Solomon tapno ipanguloanna ti amin a trabaho iti bronse.
Dagiti Dua a Bronse nga Adigi
15 Nangsukog ni Hiram iti dua nga adigi a bronse a 27 a kadapan ti katayag ti tunggal maysa ket 18 a kadapan ti rukodna iti aglawlaw.Inkabilna dagitoy iti pagserkan ti Templo.
16 Nangaramid met iti dua a bronse a paratok a maisaad iti tuktok ti adigi. Agtayag ti tunggal maysa iti 7 1/2 a kadapan.
17 Naarkosan ti tuktok ti tunggal adigi iti aglilinnaga a kawar
18 ket dua nga intar ti sinan-granada a bronse.
19 Kasla sabong ti lirio ti sukog dagiti paratok. Innem a kadapan ti katayagda
20 ken naiparabawda iti nagtimbukel a paset iti ngatoen dagiti aglilinnaga a kawar. Adda dua nga intar ti sinan-granada iti lawlaw ti tunggalparatok, sagsangagasut a granada iti kada intar.
21 Impatakder ni Hiram dagiti dua a bronse nga adigi iti sango ti pagserkan ti Templo. Napanaganan iti Jakinti akin-abagatan nga adigi ket Boazmet ti akin-amianan.
22 Naisaad dagiti sinan-lirio a paratok iti rabaw dagiti adigi.
Nalpas ti pannakaaramid dagiti adigi.
Ti Tangke a Bronse
23 Nanglunag ni Hiram iti bronse ket nangaramid iti nagtimbukel a tangke. Pito ket kagudua a kadapan ti kaunegna, 15 a kadapan ti ngarabna ket 45 a kadapan iti aglawlawna.
24 Nalikmut ti akinruar a ngarab iti dua nga intar a sabsabong a bronse nga 45 a kadapan iti tunggal intar a nasukog a sangsangkamaysa iti tangke.
25 Naisaad ti tangke kadagiti bukot ti 12 a sinan-baka a bronse. Sumango iti ruar dagitoy a sinan-baka ket saggatlo ti sumango iti daya, laud, abagatan ken amianan.
26 Tallo a pulgada ti kapuskol ti tangke. Kasla ngarab ti kopa ti sukog ti ngarabna ket kasla agukrad a sabong. Malaon ti tangke ti agarup 10,000 a galon a danum.
Dagiti Bronse a Kariton
27 Nangaramid met ni Hiram iti sangapulo a bronse a kariton. Innem a kadapan ti kaatiddog ti tunggal maysa: innem a kadapan ti kaakabada ken 4 1/2 a kadapan ti katayagda.
28 Naaramid dagitoy kadagiti kuadrado a tapi a naimontar kadagiti bastidor.
29 Adda imahen dagiti leon, baka ken kerubim kadagiti tapi. Kadagiti bastidor, iti ngatoen ken iti babaen dagiti sinan-leon ken sinan-baka, adda dagiti agkawkawikaw a ladawan.
30 Adda uppat a bronse a pilid ken bronse nga ehe ti tunggal kariton. Kadagiti uppat a suli, adda dagiti bronse a pagbatayan ti palanggana; naarkosan dagitoy kadagiti imahen a nagkawikaw.
31 Adda nagtimbukel a bastidor a mamagkamang kadagiti pagbatayan ti palanggana. Agdawadaw daytoy iti 18 a pulgada manipud iti rabaw ti kariton ket umuneg iti pito a pulgada. Nakitikitan ti aglawlawna.
32 Agtayag iti 25 a pulgada ti tunggal pilid; addada iti babaen dagiti tapi ket sangsangkanayon ti ehe ken ti kariton.
33 Kasla pilid ti lugan a pakigubat ti pilid ti kariton. Pasig a bronse ti ehe, basikaw, rayos ken palaupo.
34 Natukal amin dagiti uppat a suli ti kariton; sangsangkanayon dagiti tukal ken ti kariton.
35 Adda siam a pulgada ti kaakabana a barikes a naipulipol iti rabaw ti tunggal kariton; dagiti pagbatayanna ken dagiti tapi sangsangkanayonda iti kariton.
36 Naarkosan dagiti pagbatayan ken dagiti tapi kadagiti imahen ti kerubim, leon ken kayo a palma ket masarakanda no la ket adda pagyananda. Adda dagiti agkawikaw a ladawan iti aglikmut.
37 Kastoy ti pannakaaramid dagiti sangapulo a kariton. Agpapadada iti sukog ken rukod.
38 Nangaramidpay ni Hiram iti sangapulo a palanggana, maysa a palanggana iti tunggal kariton. Innem a kadapan ti ngarab ti tunggal palanggana ket malaonna ti 200 a galon a danum.
39 Inkabilna ti lima a kariton iti Templo iti bangirna ti abagatan ken ti sabali a lima iti amianan. Inkabilna ti tangke iti abagatan-a-daya a suli ti Templo.
Ti Listaan dagiti Alikamen ti Templo
40-45 Nangaramid pay ni Hiram kadagiti banga, pala, ken malukong. Nalpasna amin a trabahona nga agpaay iti Templo ni Yahweh, kas imbaga ni Ari Solomon. Dagitoy ti inaramidna:
Dagiti dua nga adigi
Dagiti dua a sinan-malukong a paratok iti tuktok dagiti adigi
Dagiti aglilinnaga a kawar iti tunggal paratok
Dagiti 400 a sinan-granada a naipalikmut kadagiti aglilinnaga a kawar iti tunggal paratok; dua nga intar a sagsasangagasut ti adda iti tunggal paratok
Dagiti sangapulo a kariton
Dagiti sangapulo a palanggana
Ti tangke
Dagiti 12 a sinan-baka a nakaisaadan ti tangke
Dagiti banga, pala ken malmalukong
Pasig a napasileng a bronse amin dagitoy nga alikamen ti Templo nga inaramid ni Hiram para ken ni Ari Solomon.
46 Pinaaramid ti ari amin dagitoy iti pagsukogan ti metal nga adda iti nagbaetan ti Succot ken Zaretan iti Tanap ti Jordan.
47 Saan a pinatimbang ni Solomon dagitoy bronse nga alikamen; aduda ket narigat nga ammoen ti dagsenda.
48 Nagpaaramidpay ni Solomon kadagiti balitok nga alikamen ti Templo: ti altar a balitok, ti lamisaan ti tinapay a maidaton iti Dios,
49 dagitisangapulo a balitok a kandelero iti sangoanan ti Kasasantoan a Disso, lima iti akinkannawan ket lima met iti akinkannigid; dagiti sinan-sabong a balitok, dagiti balitok a pagsilawan ken sipit;
50 dagiti balitok a kopa, pagarsang, malukong, insensario ken dagiti pagikkan iti beggang; ken dagiti bisagra dagiti ridaw ti akin-uneg ken masungad a santuario.
51 Idimalpas ni Ari Solomon ti amin a trabaho iti Templo, inkabilna kadagiti pagiduldulinan ti Templo dagiti amin nga alikamen nga indaton daydi amana a David ken ni Yahweh—ti pirak, ti balitok ken dadduma nga alikamen.