Agdawat ni Ari Solomon iti Sirib
1 Natalged ti panagturay ni Solomon nga anak ni Ari David ta binendisionan ni Yahweh a Diosna, ket pinagbalinna a nabileg unay.
2 Pinaayaban ni Ari Solomon dagiti amin nga ofisiales a pangulo dagiti buyot a rinibu ken buyot a ginasut, amin nga ofisiales ti gobierno, amin nga ulo ti familia ken amin a tattao.
3 Imbilinna kadakuada a kumuyogda kenkuana a mapan iti lugar a pagdaydayawan idiay Gabaon, ta adda sadiay ti Tolda ti Dios nga inaramid ni Moises nga adipen ti Dios idi addada idiay let-ang. (
4 Nupaykasta, adda ti Lakasa ti Tulag ti Dios idiay Jerusalem. Naikabil iti tolda a binangon ni Ari David idi innalana ti Lakasa manipud iti Siudad ti Jearim.)
5 Addamet idiay Gabaon ti altar a bronse nga inaramid idi ni Bezalel nga anak ni Uri ken apoko ni Hur. Naikabil ti altar iti sangoanan ti Tolda ti Dios. Napan sadiay ni Solomon ken dagiti amin a tattao ket nagdaydayawda iti Dios.
6 Iti sangoanan ti Tolda, nagdaydayaw ti ari ken ni Yahweh babaen iti panangidatagna kadagiti daton iti rabaw ti altar a bronse. Nangidaton iti 1,000 nga animal ket pinuoranna ida a sibubukel iti rabaw ti altar.
7 Iti dayta a rabii, nagparang ti Dios ken ni Solomon ket sinaludsodna, “Ania ti kayatmo nga itedko kenka?”
8 Simmungbat ni Solomon, “Naimbagkay unay iti daydi amak a David, ket ita, insaadnak nga ari a sukatna.
9 OApoa Dios, natungpalen ti inkarim kenkuana. Insaadnak nga ari dagiti nakaad-adu a tattao a di mabilang ti kaaduda.
10 Itedmo ngarud kaniak ti sirib ken ti ammo a kasapulak iti panangiturayko kadagitoy a tattao. No saan, kasano a matarawidwidak daytoy dakkel a pagilian?”
11 Insungbat ti Dios ken ni Solomon, “Nasayaat ti pinilim. Dimo tinarigagayan ti sanikua, wenno kinabaknang ken dayaw. Dimo met dinawat ti ipapatay dagiti kabusormo, wenno ti napaut a panagbiag, ngem nagkiddawka iti sirib ken ammo tapno maiturayam dagitoy a tattao a nangisaadak kenka nga ari.
12 Ikkanka iti sirib ken pannakaawat. Saan la a dayta. Paraburanka pay iti ad-adu a kinabaknang, sanikua ken dayaw nga awan pay ari a nakaitedanna wenno pakaitedannanto.”
Ti Bileg ken Kinabaknang ni Solomon
13 Pimmanawni Solomon iti pagdaydayawan idiay Gabaon, nga ayan ti nasagradoan a Tolda, ket nagsubli idiay Jerusalem. Sadiay ti nangiturayanna iti Israel.
14 Nangbuangayiti buyot a buklen ti 1,400 a lugan a pakigubat ken 12,000 a mannakigubat a nagkabalio. Inkabilna dagitoy idiay Jerusalem ken iti nadumaduma a siudad.
15 Bayat ti panagturayna, nagbalin a gagangay a kas bato ti kaadu ti pirak ken balitok idiay Jerusalem. Adu ti kayo a sedro a kas iti kaadu dagiti sikamoro kadagiti katurturodan ti Juda.
16 Naggatangdagiti tattaona kadagiti kabalio idiay Musriken Cilicia.
17 Naggatangda pay kadagiti lugan a pakigubat idiay Egipto sada ilako idi kadagiti ari dagiti Heteo ken Siriano; isuda pay ti paggapuan dagiti kabalioda. Agpateg iti 600 a bagi ti pirak ti tunggal lugan a pakigubat ken 150 a bagi ti pirak ti tunggal kabalio.