Ni Joahaz nga Ari ti Juda
1 Pinili dagiti tattao ti Juda ni Joahaz nga anak ni Josias, ket kinonsagrarda nga ari idiay Jerusalem.
2 Agtawen iti 23 ni Joahaz idi maisaad nga ari ti Juda ket tallo a bulan a nagturay idiay Jerusalem.
3 Innala ni Neco nga ari ti Egipto a kas balud, ket pinagbuisna ti Juda iti 7,500 a libra a pirak ken 75 a libra a balitok.
4 Insaadni Neco ni Eliakim a kabsat ni Joahaz nga ari ti Juda ket sinukatanna ti naganna iti Jehoyakim. Naipan ni Joahaz idiay Egipto.
Ni Jehoyakim nga Ari ti Juda
5 Agtaweniti 25 ni Jehoyakim idi maisaad nga ari iti Juda ket 11 a tawen a nagturay idiay Jerusalem. Nagbasol ken ni Yahweh a Diosna.
6 Rinautni Nebucadnesar nga ari ti Babilonia ti Juda. Tiniliwna ni Jehoyakim, ket kinawaranna nga impan idiay Babilonia.
7 Impanna met iti palasiona dagiti dadduma a gameng ti Templo.
8 Nailanad itiPakasaritaan dagiti Ari ti Israel ken Judadagiti amin nga inar-aramid ni Jehoyakim, agraman dagiti makarimon nga ugalina ken dakes nga inar-aramidna. Ni Jehoyakin nga anakna ti simmukat kenkuana nga ari.
Ni Jehoyakin nga Ari ti Juda
9 Agtawen iti 18 ni Jehoyakin idi maisaad nga ari ti Juda, ket tallo a bulan ken sangapulo nga aldaw a nagturay idiay Jerusalem. Nagbasol met ken ni Yahweh.
10 Itipanangrugi ti tawen, innala ni Ari Nebucadnesar ni Jehoyakin ket impanna a kas balud idiay Babilonia. Innalana met dagiti gameng ti templo. Insaad ni Nebucadnesar ni Zedekias a kabsat ni Jehoyakin a kas ari ti Juda ken Jerusalem.
Ni Zedekias nga Ari ti Juda
11 Agtaweniti 21 ni Zedekias idi maisaad nga ari ti Juda, ket 11 a tawen a nagturay idiay Jerusalem.
12 Nagbasol ken ni Yahweh. Saan a nagpakumbaba ket dina impangag ni profeta Jeremias a nangipakaammo iti sao ni Yahweh.
Ti Pannakaparmek ti Jerusalem
13 Immalsani Zedekias a maibusor ken ni Ari Nebucadnesar a nangpilit kenkuana nga agsapata iti Dios tapno agtalinaed a napudno. Natangken ti ulona ket dina kinayat ti agbabawi ken agsubli ken ni Yahweh a Dios ti Israel.
14 Maysa pay, tinulad dagiti papangulo ti Juda, dagiti papadi ken dagiti tattao ti aramid dagiti nasion iti aglawlawda; nagdaydayawda met kadagiti imahen ket natulawan ti Templo a pinagbalin ni Yahweh a nasantoan.
15 Kayat ni Yahweh a Dios dagiti kapuonanda nga ispalen dagiti tattaona ken ti Templona, isu nga intultuloyna ti nangibaon kadagiti mangballaag kadakuada.
16 Ngem rinabrabakda laeng dagiti naibaon ken dagiti profetana ket kinatkatawaanda ti aniaman nga ibagada. Nagangayanna, napunnoan ni Yahweh ket simged ti pungtotna kadagiti tattaona.
17 Imbaonni Yahweh ti ari ti Babilonia a mangraut kadakuada. Pinatay ti ari dagiti lallaki nga agtutubo ti Juda iti Templo. Awan ti kinaasianna—ubbing wenno nataengan, lallaki wenno babbai, masakit wenno nasalun-at. Inyawat amin ida ti Dios iti pannakabalin ti ari.
18 Sinamsam ti ari ti Babilonia ti amin nga alikamen iti uneg ti Templo agraman dagiti sanikua ti ari ken dagiti ofisialesna, ket impanna dagitoy idiay Babilonia.
19 Pinuorannati Templo ken ti siudad agraman dagiti amin a palasio ken kinabaknang ti siudad, ket rinebbana dagiti bakud ti siudad.
20 Impanna idiay Babilonia dagiti tattao a saan a napapatay. Sadiay, nagserbida a tagabu kenkuana ken kadagiti kaputotanna agingga a pimmigsa ti pagarian ti Persia.
21 Ketnatungpal ti sao ni Yahweh idi imbagana ken ni profeta Jeremias, “Aginananto ti daga iti uneg ti 70 a tawen a sukat dagiti Tawen a Panaginana a saan a nangilin.”
Ibilin ni Ari Ciro nga Agsubli dagiti Judio
22 Tapno matungpal ti impaltiing ni Yahweh ken ni profeta Jeremias, tinignayna ni Ciro nga emperador ti Persia tapno mangipaulog iti bilin a maibasa iti entero a paset ti pagarianna. Napasamak daytoy iti umuna a tawen a panagturay ni Ciro.
23 Kastoyti nailanad: “Bilin daytoy ni Ciro nga emperador ti Persia. Insaadnak tiApoa Dios ti Langit tapno iturayak ti entero a lubong. Impaannongna kaniak ti pannakabangon iti maysa a pasdek nga agpaay a templona idiay Jerusalem iti Juda. Ita, siasinoman a maibilang kadagiti tattao ti Dios, ibilinko ti ipapanyo idiay Jerusalem. Sapay koma ta kumuyog kadakayo tiApoa Diosyo.”