Ti Pagtungpalan ti Managdakdakes ken ti Nalinteg
1 Dika agsikor gapu
kadagiti managdakdakes;
dimo apalan dagiti agaramid iti dakes.
2 Ta mapukawdanto a kas ruot a magango;
kas mula malaylay, mataydanto.
3 Agtalekka itiApoket agaramidka iti naimbag.
Agnaedka iti daga ket awan pakaan-anoam.
4 Sapulem itiApoti pagragsakam,
ket itednanto ti tartarigagayam.
5 Ikumitmo ta bagim itiApo;
agtalekka kenkuana ket tulongannaka.
6 Pagraniagennanto a kas aldaw ti kinaimbagmo,
ken kas iti init ti agmatuon ti kinalintegmo.
7 Aganuska ket urayem nga
agtignay tiApo.
Dimo pakasikoran dagiti rumang-ay ti panagbiagda,
wenno dagiti agballigi iti dakes a panggepda.
8 Igagam ta pusom iti nalaus a panagpungtot.
Yegna laeng ti riribuk.
9 Dagiti agtalek itiApo,
tagikuaendanto ti daga.
Ngem dagiti managdakdakes,
mapagtalawda nga awan duadua.
10 Iti saan a mabayag,
mapukawto dagiti managdakdakes,
uray no sapulem ida,
awandanton iti sigud nga ayanda.
11 Ngemdagiti napakumbaba tagikuaendanto ti daga,
ken lak-amendanto ti rang-ay ken talna.
12 Ti managdakdakes isikatna ti nalinteg,
ket agngariet iti gurana kenkuana.
13 Ngem katawaan ti Apo ti managdakdakes,
ta ammona nga asidegen ti ipapatayna.
14 Asuten dagiti managdakdakes ti kampilanda,
biatenda ti bai ti panada
tapno patayenda dagiti napanglaw ken marigrigat,
ken gudasenda dagiti nalinteg ti aramidda.
15 Ngem maduyokdanto kadagiti kampilanda a mismo,
ket dagiti bai ti panada, matukkolto.
16 Napatpateg nga adayo
ti sangkabassit a sanikua ti nalinteg
ngem ti amin a kinabaknang ti managdakdakes.
17 Ikkaten tiApoti pigsa dagiti managdakdakes,
ngem salaknibanna dagiti nalinteg.
18 Aywanan tiApodagiti agtulnog kenkuana,
ket tawidendanto nga agnanayon ti daga.
19 Didanto agsagaba iti tiempo ti didigra;
iti tiempo ti bisin, dinto agkurang ti kanenda.
20 Ngem matayto dagiti managdakdakes;
mapukawto dagiti kabusor ni Yahweh
a kas balang a sabsabong;
agpukawdanto a kas asuk.
21 Umutang ti managdakdakes ket saan nga agbayad,
ngem sibubuslon a mangted ti nalinteg.
22 Dagiti binendisionan ni Yahweh, tawidendanto ti daga,
ngem mapagtalawto dagiti inlunodna.
23 TiApoti mangidalan
iti tao iti rumbeng a pagnaanna,
ket salaknibanna dagiti mangparagsak kenkuana.
24 Uray no maitibkol, awan duadua ti ibabangonna,
ta tengtenglen tiApoti imana.
25 Nagubingak ngem ita lakayakon,
ngem awan pay nakitak a nalinteg a binaybay-an tiApo,
wenno dagiti annakna a makipalpalama.
26 Managparabur ken managpabulod ti naimbag a tao,
ket agbalin a bendision dagiti annakna.
27 Adaywam ti dakes ket aramidem ti naimbag,
ket agnaedto ti kaputotam nga agnanayon iti daga.
28 Ayaten tiApoti hustisia,
dina baybay-an dagiti napudno a tattaona.
Salaknibanna ida nga awan inggana,
ngem mapagtalawto ti kaputotan dagiti managdakdakes.
29 Dagiti nalinteg tawidendanto ti daga,
ket iti agnanayon, agnaeddanto a natalna.
30 Ti nalinteg a tao, nainsiriban dagiti balikasna,
ket tumutop dagiti amin a sasawenna.
31 Salimetmetanna ti linteg ti Dios iti pusona,
ket saanna a pagpanawan.
32 Ti managdakdakes siimenna ti naimbag a tao,
ket isikatna a papatayen.
33 Ngem dinto baybay-an ni Yahweh
a matnag iti pannakabalin ti kabusorna;
ket inton maidarum,
dinanto met palubosan a madusa.
34 Mangnamnamaka itiApo
ket tungpalem dagiti bilbilinna.
Padayawannakanto babaen iti pannangtedna iti daga,
ket makitamto ti pannakapaksiat ti managdakdakes.
35 Nakitak ti maysa a tao a nadangkes;
narangpaya ken nangato a kas iti sedro ti Libano.
36 Idi lumabasakiti naminsan, awanen sadiay;
binirbirokko ngem saankon a nasarakan.
37 Siputam ti naimbag a tao, paliiwem ti nalinteg;
adda kaputotan ti natalna a tao.
38 Ngem madadael a mamimpinsan dagiti managbasol,
ket maikisap dagiti kaputotanda.
39 Isalakan tiApodagiti nalinteg a tattao,
ket salaknibanna ida iti tiempo ti riribuk.
40 Tulongan ken ispalenna ida;
isalakanna ida kadagiti managdakdakes,
ta agkamangda a pasalakniban kenkuana.