1 “Apay a dika nagbalin a kabsatko?

Pinasusonaka koma ti inak, inaywanannaka,

tapno awan agdildillaw no agkanka,

no masabatka iti kalsada.

2 Yawidka koma iti balay ti inak

ket isuronak nga agayat.

Ikkanka koma iti nalaokan nga arak,

ti arak a nagtaud iti granada a mulak.

3 “Agpungpunganak iti kannigid a takkiagmo,

ket lalailoennak ti kannawanmo.

4 Ikariyo kaniak, babbai iti Jerusalem,

a diyo singsingaen ti ayatmi.”

Ti Maikanem a Kanta

5 “Siasino daytoy sumungad nga aggapu iti let-ang

nga agkibkibinda iti ay-ayatenna?”

“Riniingka iti sirok ti mansanas,

iti lugar a nakaipasngayam.

6 Siak laeng ti ayatem,

siak laeng ti arakupem.

Nabileg ti ayat a kas iti patay;

naranggas ti imon a kas iti tanem.

Rumasuk a kas sumgiab nga apuy,

ket gumil-ayab a kas iti nadawel nga uram.

7 Saan a masebseban ti adu a danum,

ket awan ti layus a makaiddep.

Ngem no adda agpanggep a gumatang iti ayat,

pannakaumsinto laeng ti inna maragpat.”

8 “Adda kabsatmi nga ubing a babai,

babassit pay la dagiti susona.

Anianto ti ipaaymi iti kabsatmi

inton adda barito nga agarem kenkuana?

9 No maysa a bakud ti kabsatmi,

ibangonanmi iti pirak a torre a salaknibna.

No maysa a ruangan,

pakalupkopanmi iti sedro.”

10 “Maysaak a bakud

ket dagiti susok ti torrena.

Ammo unay ti kaayan-ayatko

a natalged ti salaknibko

ket awan pakaan-anoak.”

11 “Adda kaubasan ni Solomon

iti lugar a managan Baal Hamon.

Adda dagiti mannalon a nangipaabanganna;

tunggal maysa sangaribu a bagi ti pirak ti ibayadna.

12 Adda met bukodko a kaubasan.

Solomon, kukuam ti rinibu a pirakmo,

ket maibingayan dagiti mannalon iti sagdudua a gasutda.

13 Denggek man ti timekmo manipud iti hardin, ayatko,

Dagiti kakaduak aggagarda a makangngeg kenka.”

14 “Biagko, darasem ti umay kaniak.

Agtarayka a kas iti ugsa,

iti kabambantayan a napno iti nabanglo a mulmula.”