1 Ammom kadi no kaano a nayanak

dagiti atap a kalding ti bantay?

Naimatangam kadin ti panagpasngay ti ugsa?

2 Ammom kadi no mano a bulan ti panagsikogda

wenno ania nga aldaw ti panaganakda?

3 Ammom kadi no kaano ti panagrukobda

tapno agpasngayda?

4 Dumakkel dagiti urbonda iti kabakiran;

pumanawda ket dida agsubsublin.

5 Siasino ti nangted iti wayawaya dagiti atap nga asno?

Siasino ti nangibulos kadakuada tapno agturongda iti kaykayatda a papanan?

6 Intedko ti let-ang a pagtaenganda,

ket pinagnaedko ida iti naapgad a daga.

7 Adaywanda dagiti naarimbangaw a siudad,

ket awan ti makapaamo kadakuada tapno pagtrabahoenda ida.

8 Sursorenda dagiti bambantay a kas pastoda

ket agbirokda iti naraber a ruot nga arabenda.

9 Mapagtrabahom kadi ti atap a nuang?

Kayatna aya ti maturog iti koralmo iti rabii?

10 Mataliam aya tapno pagaradoem

wenno pagsagadem iti talonmo?

11 Makapagpannurayka kadi iti dakkel a pigsana?

Namnamaem kadi nga aramidenna ti trabahom?

12 Manamnamam kadi nga isangpetna ti apitmo,

ket ummongenna ti nairikmo?

13 Napardas ti panagpayakpak ti abestrus!

Ngem awan ti abestrus a makatayab a kas iti kannaway!

14 Panawan ti abestrus dagiti itlogna iti daga,

ket bay-anna ti pudot ti daga a mangpessa kadakuada.

15 Dina pampanunoten

no mabaddekan dagiti itlogna

wenno pis-iten dagiti atap nga animal.

16 Kasla saan a nagtaud dagiti itlog kenkuana;

kasla awan aniaman ti nagbannoganna.

17 Siak ti namagbalin kenkuana a maag,

ket saanko nga inikkan iti sirib.

18 Ngem no rugianna ti agtaray,

atiwenna ti kabalio ken ti nagsakay.

19 Sika aya, Job, ti namagbalin kadagiti kabalio a nakapigpigsa?

Sika aya ti nangted iti agal-allon a pargayen iti tengngedda?

20 Palagtoem kadi ida a kas kadagiti dudon?

Agbuteng dagiti tattao iti panagbang-esda.

21 Sigagagarda a mangkurob iti daga iti tanap;

kasta unay ti pardasda a mapan iti paggugubatan.

22 Dida ammo ti agbuteng, dida madanagan

ket dida itarayan ti kampilan.

23 Kumalangiking ken aggilapgilap

ti igam dagiti nagsakay kadakuada.

24 Gapu iti nalaus a gagarda,

agtarayda a dagus no mapuyot ti trumpeta.

25 Agbang-esda tunggal aguni ti trumpeta;

adayoda pay ngem maangotda ti gubat.

Mangngegda ti arimbangaw;

agbilin dagiti ofisiales ket matimudda dagiti pukkaw.

26 Sika aya ti pagsursuroan ti kali iti panagtayabna,

no yukradna dagiti payakna nga agpa-abagatan?

27 Agpannuray aya ti agila iti bilinmo

tapno agaramid iti umokna iti nangato a bantay?

28 Agtaeng kadagiti kangatoan a rangkis,

ket pagbalinenna a sarikedkedna

dagiti nangato a pantok.

29 Manipud sadiay, agsiput iti alun-onenna,

adayo pay laeng ngem makitana.

30 Aguummongdagiti buitre iti ayan dagiti bangkay,

ket inumen dagiti urbonda ti dara dagiti natay.