Ti Kanta idiay Baybay

1 Kinantani Moises ken dagiti Israelita daytoy a kanta kas pammadayaw ken ni Yahweh:

“Kantaak tiApogapu iti nadayag a balligina;

inlemmesna iti baybay dagiti kabalio ken dagiti nagsakay.

2 TiApoti pigsak ken kantak;

isu ti nangisalakan kaniak.

Isu ti Diosko ket idaydayawko;

isu ti Dios ti kapuonak ket itan-okko.

3 Mannakigubat tiApo;

Yahweh ti naganna.

4 “Intappuakna iti baybay ti armada ken luglugan a pakigubat ti Egipto;

nalmes dagiti kalaingan nga ofisialesna iti Nalabaga a Baybay.

5 Iti adalem a baybay nalmesda,

limnedda a kas bato iti lansadna.

6 “Napigsa ken mannakabalinka, OApo;

ta makannawan nga imam winarawarana dagiti kabusormo.

7 Iti naindaklan a kinadayagmo,

parmekem dagiti kabusormo;

sumged ti pungtotmo ket puoranna ida a kasla garami.

8 Imbulosmo ti angin iti baybay, ket pinagpangatom ti danum.

Nagtakder a kas pader ti agay-ayus a danum,

nagbalay ti danum agingga iti lansad.

9 ‘Kamatentay ida. Tiliwentay ida,’ kinuna ti kabusor.

‘Bingayentayo ti kinabaknangda

ket alaentayo ti amin a kayattayo;

asutentayo ti kampilantayo, ket alaentayo amin nga adda kadakuada.’

10 Ngem iti maysa la a pug-awmo,Apo, nalmes dagiti Egipcio;

kasda la buli a limned iti nakabutbuteng a danum.

11 “Siasino, OApo, kadagiti didiosen ti kas kenka?

Siasino ti umasping kenka

iti nakaskasdaaw a kinasantom?

Siasino ti pumada kenka nga agar-aramid iti milagro

ken pagbutngan gapu kadagiti nakaskasdaaw nga aramidmo?

12 Ilayatmo ta kannawan nga imam

ket alun-onen ti daga dagiti kabusormi.

13 Napudnoka iti karim,

idalanmo dagiti inispalmo a tattao;

babaen iti pigsam iturongmo ida iti nasantoan a taengmo.

14 Agwaras ti damag

ket agtigerger dagiti pagilian;

uray dagiti Filisteo inda mapabutngan.

15 Agbuteng dagiti pangulo ti Edom,

agpigpigerger dagiti maingel ti Moab;

mapukaw ti tured dagiti amin nga agnaed idiay Canaan.

16 Buteng ken alliaw

ti manglengnges kadakuada.

Gapu iti kasta unay a pigsam, OApo,

kasda la bato a di makakuti,

agingga a makalasat dagiti tattaom

nga inispalmo iti pannakatagabuda.

17 Ipanmo ida iti bantaymo ket ipasdekmo ida sadiay,

iti lugar,Apo, a pinilim a pagnaedan,

iti nasantoan a taeng nga impasdekmo.

18 Agari tiApoiti agnanayon nga awan inggana.”

Ti Kanta ni Miriam

19 Nagna dagiti Israelita iti baybay iti namaga a daga. Ngem idi timmapog dagiti Egipcio agraman dagiti lugan ken dagiti nagkabalio a soldado, pinagsubli ni Yahweh ti danum a nanglemmes kadakuada.

20 Maysa a profeta ni Miriam a kabsat ni Aaron. Innalana ti panderetana, ket simmurot kenkuana dagiti amin a babbai nga agtuktokar kadagiti pandereta ken agsasala.

21 Kinantaan ida ni Miriam:

“Kantaanyo tiApogapu iti nadayag a balligina;

inlemmesna iti baybay dagiti kabalio agraman dagiti nagsakay.”

Napait a Danum

22 Indauloan ni Moises dagiti Israelita iti ipapanawda iti Nalabaga a Baybay tapno mapanda iti let-ang ti Sur. Tallo nga aldawda a nagdaliasat iti let-ang. Awan ti masarakanda a danum.

23 Dimtengda iti maysa a disso a managan iti Mara, ngem nakapapait ti danum ket dida mainum. Isut’ gapuna a napanaganan dayta a lugar iti Mara.

24 Nagdayengdeng dagiti tattao ken ni Moises. “Ania ti inumentayo?” sinaludsodda.

25 Sipapasnekni Moises a nagkararag ken ni Yahweh ket impakita ni Yahweh kenkuana ti maysa a sanga. Innala ni Moises ti sanga sana impurruak iti ubbog ket nagbalin a mainum ti danumna.

Sadiay ti nangsuotan ni Yahweh kadakuada, ket inikkanna ida iti maysa a linteg ken di agbaliw nga alagaden.

26 Kinunana kadakuada, “No ipangagyo a sipupudno ti ibagak, ni Yahweh a Diosyo, ket aramidenyo ti ibilangko a nalinteg, saankayto a dusaen iti uray ania a sakit nga impalak-amko kadagiti Egipcio. Siak ni Yahweh a mamaimbag kadakayo.”

27 Kalpasanna, dimtengda idiay Elim nga yan ti sangapulo ket dua nga ubbog ken pitopulo a puon ti palma. Nagkampoda iti igid ti danum sadiay.