Kararag a Pagdawat iti Pannakasalaknib

1 Denggem, OApo, ti asugko;

timudem dagiti balikasko.

2 Ipangagmo kadi, O Arik ken Diosko,

ti panagdawatko iti tulongmo.

Agkararagak kenka, OApo.

3 Mangngegmo ti timekko iti bigat,

no sumingising ti init agkararagak,

ket urayek ti sungbatmo kaniak.

4 Saanka a Dios a maragsakan iti kinakillo;

dimo ipalubos nga adda agaramid iti kinadakes.

5 Awan lugar dagiti natangsit iti ayanmo,

ta kaguram amin nga agaramid iti kinadakes.

6 Dadaelem dagiti naulbod, OApo,

ket umsiem ti narungsot ken manangallilaw.

7 Ngem gapu iti naindaklan nga ayatmo,

makastrekak iti balaymo;

makapagdaydayawak iti Templom a nasantoan,

ket agrukbabak a siraraem iti sangoanam.

8 Idalannak, OApo, nga agaramid iti pagayatam,

agsipud ta adu dagiti kabusorko.

Iturongnak a magna iti dalanmo.

9 Tisao dagiti kabusorko saan a mapagtalkan;

ti la mangdaddadael ti inda tartarigagayan.

Kasla silulukat a tanem ti ngiwatda,

nalamuyot ngem bin-ig a pangallilaw ti saoda.

10 Diosko, ukomem ken dusaem ida;

dagiti koma panggepda ti pakadadaelanda.

Iti imatangmo, pagtalawem ida

gapu iti adu a basolda

ken iti panangbusorda kenka.

11 Ngem agrag-o amin nga agtalek iti pannalaknibmo;

mabalinda latta ti agkanta iti rag-o.

Salaknibam dagiti agayat kenka,

ta gapu kenka masarakanda ti pudno a ragsakda.

12 Bendisionam, OApo, dagiti agtulnog kenka,

kasla kalasag ti ayatmo a mangsalaknib kadakuada.