Ti Kinaababa ken Kinaubbaw ti Biag

1 Kinunak, “Annadak dagiti tignayko,

ket diak ipalubos a pagbasolennak ti dilak.

Diak agsao iti uray ania

no asideg dagiti managdakdakes.”

2 Diak nagtagtagari ket nagulimekak;

diak nagsao uray pay maipapan iti naimbag!

Ngem ad-adda ketdi a nagsagabaak,

3 ket napno ti pusok iti panagdanag.

No ut-utobek, ad-adda a bumara ti riknak;

diak matengngel ti bagik ket kinunak:

4 “OApo, kaanonto ti ipapatayko.

Kasano pay kabayag ti panagbiagko?

Inton ano ti panaggibus dagiti aldawko?”

5 Nagababa ketdin ti biag nga impabulodmo!

Kasla awan aniamanna iti imatangmo.

Wen, kasla pul-oy laeng ti angin ti biag ti tao;

6 awan giddiatna iti anniniwan!

Wen, ubbaw amin dagiti aramidna;

agurnong iti kinabaknang ngem dina ammo

no siasinonto ti agnam-ay iti sanikuana!

7 “Ket ita, O Apo, ania ngarud ti urayek?

Adda kenka ti namnamak.

8 Isalakannak iti amin a basolko;

dimo ipalubos a pagang-angawandak dagiti maag.

9 Agulimekak, diak agsao iti aniaman a balikas,

agsipud ta sika ti nangipaay iti panagsagabak.

10 Isardengmon ti panangdusam kaniak;

Matayakon gapu kadagiti danog nga impalak-ammo.

11 No agbasol ti tao, dusaem babaen iti panangbabalawmo;

kaskala sanga a mangdadael iti napateg kenkuana.

Kinapudnona, ti tao pul-oy laeng ti angin ti arigna!

12 “OApo, denggem kadi ti kararagko,

ket ipangagmo ti ararawko.

Dika koma agulimek

no kenka umawagak.

Ganggannaetak laeng kenka,

maysaak a sangaili a kas kadagiti kapuonak.

13 Dinak kadi dusdusaen tapno mabang-aranak,

sakbay a pumusayak ket awanakon ditoy a biag.”