Kararag a Pagdawat iti Tulong
1 Suppiatem, OApo,
dagiti mangsuppiat kaniak,
gubatem dagiti manggubat kaniak!
2 Alaem ti kalasag ken igammo,
ket umaynak tulongan.
3 Isaganam ti gayang ken wasaymo,
ket sarangtem dagiti kumamat kaniak!
Ikarim kaniak nga isalakannak.
4 Maibabain ken maabak koma
dagiti agpanggep a mangpatay kaniak!
Mapasanud ken mariribuk koma
dagiti agtarigagay a mangranggas kaniak!
5 Kasda la koma taep a mayangin,
idinto a kamaten ida ti anghel tiApo!
6 Nasipnget ken nagalis koma ti dalanda,
bayat ti panangsunson ti anghel tiApokadakuada.
7 Nangaramidda nga awan gapgapuna iti silo tapno tiliwendak.
Nagkalida iti nauneg nga abut a pangipalab-oganda kaniak.
8 Ngem madadaeldanto a dida mapakpakadaan;
matiliwdanto iti palab-og nga impakatda,
ket matnagdanto iti mismo nga abuta kinalida!
9 Ngem gapu itiApoagragsakakto;
gapu ta insalakannak, agrag-oakto.
10 Iti amin a pusok, kunakto itiApo,
“Awanen ti kas kenka!
Salaknibam dagiti nakapuy
iti ranggas dagiti napigsa.
Salaknibam met dagiti napanglaw ken nakakaasi iti ulpit dagiti mangidadanes!”
11 Agsaksi dagiti managdakdakes iti maibusor kaniak,
ket ipabasolda kaniak ti diak inaramid.
12 Dakes ti isupapakda iti impaayko nga imbag,
ket malmesak iti pannakaupay.
13 Ngem nagladingitak idi masakitda;
nagayunarak gapu kadakuada.
Nagkararagak a sidudumog,
14 kaslaak la mangikarkararag
iti gayyem wenno kabsat.
Nagpagnapagnaak a sidudumog ken silaladingit
a kas iti anak a mangdung-aw iti inana.
15 Ngem nagragsakda idi naitibkolak,
nagkatkatawada a nanglawlaw kaniak.
Kinabkabildak dagiti saanko nga am-ammo;
saandak a sinardengan a minalmalo.
16 Awan sarday a rinabrabakdak,
ket nagngarietda iti pungtotda kaniak.
17 Kasano pay ti kabayag, OApo,
a buybuyaennak lattan?
Arayatennak kadi no darupendak.
Isalakanmo ti biagko kadagitoy a leon!
18 Agyamanakto kenka iti gimong dagiti tattaom.
Idaydayawkanto iti sangoanan ti dakkel a taripnong.
19 Dimoipalubos dagiti naulbod a kabusorko
nga agragsak iti pannakaparmekko!
Dimo palubosan dagiti manggura kaniak nga awan gapgapuna
a pagragsakanda ti panagladingitko.
20 Saanda nga agsao a kas gagayyem;
agparboda ketdi iti amin a kita ti ulbod
a maibusor kadagiti tattao nga agayat iti talna.
21 Iriawda ti panangpabasolda kaniak,
“Hoy! Nakitami ti inaramidmo,” kunada.
22 Ngem sika, OApo, nakitanak;
saanka ngarud nga agulimek.
Dika kadi umadayo kaniak!
23 Agriingka, O Apo, ket ikaluyanak;
tumakderka, Diosko, ket ikalintegannak.
24 Nalintegka, OApo,
ipakaammom ngarud nga awan basolko.
Dimo ipalubos, O Diosko,
nga agragsak dagiti kabusorko!
25 Dimo ipalubos a kunada iti bagida,
“Naparmekmin a namimpinsan!”
Dimo ipalubos a kunada,
“Ala, dayta man ti kayatmi!”
26 Mamimpinsan koma
a maparmek ken mariribuk
dagiti maragsakan iti panagsagabak.
Maibabain ken maipababa koma
dagiti mangipapan a naim-imbagda ngem siak!
27 Agdir-i koma a sirarag-o iti mamin-adu
dagiti maragsakan iti pannakawayawayak.
Kunada koma, “Naindaklan tiApo;
agragsak iti panagballigi ti adipenna!”
28 Iti kasta, ipakaammokto ti kinalintegmo,
ket agmalmalem nga idaydayawkanto.