Dagiti Sagut iti Pannakabangon ti Templo

1 Impakaammoni Ari David iti entero a gimong: “Ni Solomon nga anakko ti pinili ti Dios, ngem ubing pay laeng ken awan padpadasna. Naindaklan ti trabaho agsipud ta saan a palasio ti tao, no di ket templo tiApoa Dios.

2 Inaramidko ti amin a kabaelak a nangisagana kadagiti amin a masapsapul a pangbangon iti Templo: balitok, pirak, bronse, landok, kayo, agkakapateg a bato a pagtampok, batbato nga arkos ken nawadwad a marmol.

3 Saan la a dayta ti insaganak, nangtedak pay iti bukodko a pirak ken balitok, gapu ta kayatko a mabangon ti Templo ti Diosko.

4 Nangtedak iti 115 a tonelada iti kapintasan a balitok ken 265 a tonelada ti puro a pirak a pangarkos kadagiti diding ti Templo

5 ken kadagiti amin a banag nga aramiden dagiti platero. Ita, siasino pay ti mayat a mangted a sibubuslon iti sagut nga agpaay itiApo?”

6 Iti kasta, nagboluntario a mangted dagiti pangulo dagiti kapuonan, dagiti ofisiales dagiti tribu, dagiti kapitan ti armada ken dagiti administrador kadagiti sanikua ti ari.

7 Dagitoy ti intedda nga agpaay iti Templo: 190 a tonelada a balitok, 380 a tonelada a pirak, 675 a tonelada a bronse ken 3,750 a tonelada a landok.

8 Amin nga addaan kadagiti napateg a bato, intedda iti pagidulinan iti kuarta idiay Templo nga imatonan ni Jehiel a Levita a nagtaud iti kapuonan ni Gerson.

9 Siaayat dagiti tattao a nangted kadagitoy ken ni Yahweh, ket naragsakda agsipud ta adu ti naited. Kasta unay met ti ragsak ni Ari David.

Idaydayaw ni David ti Dios

10 Iti sango ti entero a gimong, indaydayaw ni David ni Yahweh. Kinunana, “OApoa Dios ni Jacob a kapuonanmi, madaydayawka koma iti agnanayon.

11 Naindaklanken mannakabalinka, nadaeg, nadayag ken natan-okka. Kukuam amin nga adda sadi langit ken ditoy daga. Sika ti ari ken kangatoan a mangituray iti amin.

12 Sika ti pagtaudan ti amin a kinabaknang ken sanikua, sika ti mangituray iti amin. Addaanka ti pigsa ken pannakabalin ket sika ti mangitan-ok ken mangted iti pigsa iti amin.

13 Ita, agyamankami kenka, O Diosmi, ket idaydayawmi ti nagloriaan a naganmo.

14 “Nupay kasta, siasinoak ken dagiti tattaok, tapno kabaelanmi nga ited kenka dagitoy? Sika met laeng ti naggapuan dagitoy a sagut ket isublimi laeng ti kukuam.

15 Ammom, OApo, a kas kadagidi kapuonanmi, ganggannaet ken agalla-allakami. Kasla aniniwan nga aglabas dagiti aldawmi, ket dimi maliklikan ti patay.

16 OApoa Diosmi, inyegmi amin dagitoy a sanikua a pangbangonmi iti templo a pangdaydayaw iti nasantoan a naganmo, ngem naggapuda amin kenka ket kukuam ida.

17 Ammok a suotem ti puso ti tunggal maysa ket maragsakanka kadagiti nalinteg a tattao. Napudno ken napasnekak a nangted amin kadagitoy kenka. Nakitak ti ragsak dagiti amin a tattaom a naummong ditoy a mangyeg kadagiti sagutda kenka.

18 OApoa Dios da Abraham, Isaac ken Jacob a kapuonanmi, taginayonem kadi iti puso dagiti tattaom daytoy a kinaanep ti panagayat ket taginayonem ti kinapudnoda kenka.

19 Ikkam ni Solomon nga anakko iti naimpusoan a tarigagay nga agtulnog kadagiti amin a bilinmo ken mangbangon iti Templo nga insagsaganaak.”

20 Kalpasanna, binilin ni David dagiti tattao nga idaydayawda ni Yahweh a Diosda. Ket indaydayaw ti entero a gimong ni Yahweh a Dios dagiti kapuonanda. Nagdumog dagiti tattao ket nagdaydayawda ken ni Yahweh, ken nagkurnoda met iti ari.

21 Iti sumuno nga aldaw, nagpartida kadagiti animal ket indatonda ken ni Yahweh: 1,000 a toro a baka, 1,000 a kalakian a karnero, 1,000 nga urbon a karnero, malaksid dagiti daton nga arak ken adu nga animal para iti amin nga Israelita.

22 Iti dayta nga aldaw, kasta unay ti ragsakda a nangan ken naginum iti imatang ni Yahweh.

Kalpasanna, iti maikadua a gundaway, impakdaarda ni Solomon a kas ari. Iti nagan ni Yahweh, kinonsagrarda ni Solomon a mangituray kadakuada kasta met ni Zadok a kas padida.

23 Simmukatngarud ni Solomon ken ni David nga amana iti trono nga impasdek ni Yahweh. Nasayaat ti panagturayna ket nagtulnog kenkuana ti entero nga Israel.

24 Inkari dagiti amin nga ofisiales ken dagiti soldado, uray pay dagiti dadduma nga annak ni David, ti panagtalinaedda a napudno ken ni Solomon nga ari.

25 Gapu ken ni Yahweh, nagraem ti entero a pagilian ken ni Solomon. Pinagbalinna a natantan-ok ngem ti uray siasino nga ari a nagturay iti Israel.

Ti Pakagupgupan ti Panagturay ni David

26 Nagturay ni David nga anak ni Jesse iti entero nga Israel

27 itilas-ud ti 40 a tawen. Pito a tawen a nagturay idiay Hebron, ket 33 a tawen idiay Jerusalem.

28 Nabaknang ken mararaem ket lakay unayen idi matay. Ni Solomon nga anakna ti simmukat kenkuana nga ari.

29 Nailanad iti sinuratan dagiti tallo a profeta, da Samuel, Natan, ken Gad, ti pakasaritaan ti biag ni Ari David manipud rugi aginggat’ ipapatayna.

30 Saritaenda ti panagturayna, ti bilegna a kas ari, dagiti amin a napasamak kenkuana, iti Israel ken kadagiti dadduma a pagarian iti aglikmut.