Dagiti Agkanta ken Agtokar iti Templo

1 Pinili ni David ken dagiti papangulo dagiti Levita dagiti kaputotan da Asaf, Heman ken Jedutun a mangidaulo iti panagdaydayaw iti Dios iti templo. Isuda ti mangipakaammo kadagiti mensahe ti Dios a danggayan ti arpa ken piangpiang. Daytoy ti listaan dagiti napili a mangidalan iti panagdaydayaw ken ti rebbengda nga aramiden:

2 Dagiti annak ni Asaf: da Zaccur, Jose, Netanias ken Asarela. Indauloan ida ni Asaf a mangipakaammo iti mensahe ti Dios tunggal agbilin ti ari.

3 Dagiti innem nga annak ni Jedutun: da Gedalias, Zeri, Jesayas, Simei, Hasabias ken Mattitias. Babaen iti panangiwardas kadakuada ni Jedutun nga amada, ipakaammoda dagiti mensahe ti Dios a danggayan dagiti arpa, ken kantaenda dagiti pagdaydayaw ken pagyaman iti Dios.

4 Dagiti annak ni Heman: da Bukkias, Mattanias, Uzziel, Sebuel, Jerimot, Hananias, Hanani, Eliata, Gidalti, Romamti Ezer, Josbecasa, Malloti, Hotir ken Mahaziot.

5 Dagitoy ti inted ti Dios nga annak ni Heman a profeta ti ari; 14 a lallaki ken tallo a babbai. Inkari idi ti Dios daytoy tapno maaddaan ni Heman iti pannakabalin.

6 Agtokarda amin iti piangpiang ken arpa. Babaen iti panangidaulo ni amada, danggayanda ti panagdaydayaw iti Templo. Adda iti babaen ti ari da Asaf, Jedutun ken Heman.

7 Nalalaing amin dagitoy a lallaki, kasta met dagiti padada a Levita a batido a musiko. Dua gasut walopulo ket walo amin ti bilangda.

8 Nagbibinnunotda tapno maammoan ti annongen ti tunggal maysa; awan naidumduma, ubing man wenno lakay, nalaing man wenno agdadamo.

9-31 Dagitoy dagiti 24 a papangulo ti grupo. Sangapulo ket dua ti kamkameng ti tunggal grupo. Kastoy ti panagsasaganadda nga agserbi: 1) ni Jose iti familia ni Asaf; 2) Gedalias; 3) Zaccur; 4) Ezri; 5) Netanias; 6) Bukkias; 7) Jesarela; 8) Jesaias; 9) Mattanias; 10) Simei; 11) Azarel; 12) Hasabias; 13) Subael; 14) Mattitias; 15) Jeremot; 16) Hananias; 17) Josbecasa; 18) Hanani; 19) Malloti; 20) Eliata; 21) Hotir; 22) Giddalti; 23) Mahaziot; 24) Romamti Ezer.