Dagiti Ofisiales ni Solomon
1 Ket nagari ni Solomon iti entero nga Israel.
2 Dagitoy dagiti nangato nga ofisialesna:
Ti Padi: ni Azaria nga anak ni Zadok
3 Dagiti sekretario ti palasio: da Elioref ken Ahija nga annak ni Sisa
Ti agay-aywan kadagiti nakailanadan dagiti mapaspasamak: ni Josafat nga anak ni Ahilud
4 Ti komander ti armada: ni Benaias nga anak ni Jehoyada
Papadi: Zadok ken Abiatar
5 Pangulo dagiti agtuturay iti probinsia: ni Azaria nga anak ni Natan
Mammagbaga iti ari: ni Zabud a padi nga anak ni Natan
6 Mayordomo iti palasio: ni Ahisar
Kapatas dagiti agtrabaho iti inkapilitan: ni Adoniram nga anak ni Abda
7 Nangdutok ni Solomon iti 12 a tattao a gobernador dagiti probinsia iti entero nga Israel. Isuda ti agurnong iti taraon nga aggapu iti probinsiada para iti ari ken iti amin nga adda iti palasiona. Tinawen a mangted ti tunggal maysa kadakuada iti taraon nga agpaay iti makabulan.
8 Dagitoy dagiti agturay ken dagiti probinsia a sakupda:
Ben-hur: ti katurturodan ti Efraim
9 Bendeker: dagiti siudad ti Makaz, Saalbim, Betsemes, Elon, ken Bet-hanan
10 Ben-hesed: dagiti siudad ti Arubot ken Soco ken ti entero nga Hefer
11 Ben-Abinadab a nangasawa ken ni Tafat nga anak ni Solomon: ti entero a Dor
12 Baana nga anak ni Ahilud: dagiti siudad ti Taanac, Megiddo ken ti entero a daga iti asideg ti Bet-san, iti asideg ti Zaretan iti abagatan ti ili ti Jezreel agingga iti siudad ti Abel-Mehola ken ti siudad ti Jocmeam
13 Ben-geber: ti siudad ti Ramot idiay Galaad ken dagiti siudad dagiti tolda iti Galaad a kukua ti familia ni Jair nga anak ni Manases ken ti Argob idiay Basan—60 a dadakkel a siudad a nasarikedkedan ken nabalunetan dagiti ruanganda iti bronse
14 Ahinadab nga anak ni Iddo: ti siudad ti Mahanaim
15 Ahimaas a nangasawa ken ni Basemat a maysa kadagiti babbai nga annak ni Solomon: ti daga ti Neftali
16 Baana nga anak ni Husai: ti daga ti Aser ken ti ili ti Bealot
17 Josafat nga anak ni Parua: ti daga ti Isacar
18 Simei nga anak ni Ela: ti daga ti Benjamin
19 Geber nga anak ni Uri: ti daga ti Galaad nga inturayan idi ni Sihon nga ari dagiti Amorreo ken ni Og nga ari ti Basan
Malaksid dagitoy sangapulo ket dua, adda gobernador a mangituray iti Juda.
Ti Panagturay ni Solomon
20 Adu dagiti tattao ti Juda ken Israel, kas iti kaadu ti darat ti baybay. Nabuslon ti abastoda ken naragsakda.
21 Sakupenti pagarian ni Solomon ti amin a pagilian manipud Karayan Eufrates iti daya agingga idiay Filistia iti laud ken agingga iti beddeng ti Egipto iti abagatan. Nagbuisda kenkuana ket inturayanna ida iti unos ti panagbiagna.
22 Daytoy ti inaldaw nga abasto ni Solomon: 150 a salup a nafino nga arina ken 300 a salup a makan;
23 sangapulo a baka a napalukmeg iti kuadra; 20 a baka a napalukmeg iti pagpaaraban; 100 a karnero malaksid dagiti ugsa, gasela, korso ken ganso.
24 Iturayan ni Solomon ti amin a daga iti laud ti Eufrates manipud idiay Tifsa agingga iti siudad ti Gaza iti laud. Iturayanna dagiti amin nga ari iti laud ti Eufrates. Nakikappia kadagiti amin a kabangibang a pagilian.
25 Iti panagturay ni Solomon, natalged dagiti umili ti entero a Juda ken Israel. Adda kaubasan ken mula nga igos ti tunggal familia.
26 Addaanni Solomon iti 40,000 a kuadra para kadagiti pagpaguyod iti lugan a pakigubat ken 12,000 a nagkabalio a mannakigubat.
27 Adda batang dagiti 12 a gobernador a mangyeg iti taraon nga agpaay iti makabulan. Binulan nga yegda dagitoy nga abasto a taraon ni Solomon ken dagiti mangmangan iti palasio; itedda a kanayon ti amin a masapsapul.
28 Ited met ti tunggal gobernador ti pannakabagina a sebada ken garami a kanen dagiti kabalio a para-guyod kadagiti lugan a pakigubat ken dagiti animal a pagtrabaho. Ipanda dagitoy iti sadinoman a lugar a pakasapulanda.
29 Pinaraburan ti Dios ni Solomon iti naisangsangayan a kinasirib ken sirmata. Awan ti pumada iti kinasiribna.
30 Nasirsirib ni Solomon ngem ti amin a mamasirib a taga-daya wenno ti amin a mamasirib iti Egipto.
31 Isuti kasiriban a tao. Nasirsirib ngem ni Etan nga Ezrahita, da Emam, Calcol ken Darda nga annak ni Mahol. Nagdinamag iti amin a kabangibang a nasion.
32 Talloribua proberbio ken nasurok a 1,000 a kanta ti pinutarna.
33 Nagsao maipanggep iti kayo ken mula, manipud iti sedro ti Libano agingga iti hisopo nga agtubo kadagiti pader. Nagsao maipanggep kadagiti animal, tumatayab, parsua nga agkarkarayam ken ikan.
34 Nagdinamag iti entero a lubong ti kinasiribna ket nagibaon dagiti ari kadagiti tattao a dumngeg kenkuana.