Ikararag ni Solomon a Maikkan iti Kinasirib

1 Nakikappon ni Solomon iti ari ti Egipto babaen iti panangasawana iti anak ti ari. Inyawid ni Solomon ti asawana ket pinagnaedna iti Siudad ni David bayat ti pannakabangon ti palasiona, ti Templo ken ti bakud ti siudad.

2 Awan pay idi ti templo a nabangon a pagdaydayawan ken ni Yahweh. Agidatdaton pay laeng dagiti tattao kadagiti sakrifisio iti nadumaduma nga altar.

3 Ipatpateg ni Solomon ni Yahweh ket tinungpalna dagiti bilin daydi amana a David. Ngem nagparti met kadagiti animal ket indatagna dagitoy a kas daton a mapuoran iti nadumaduma nga altar.

4 Naminsan, napan ni Solomon idiay Gabaon tapno agidatag kadagiti sakrifisio gapu ta adda sadiay ti kalatakan nga altar. Iti napalabas, ginasgasut nga animal ti pinuoranna sadiay a kas daton.

5 Iti dayta a rabii, nagparang ni Yahweh kenkuana iti maysa a tagtagainep ket sinaludsodna, “Ania ti kayatmo nga itedko kenka?”

6 Simmungbat ni Solomon, “Imparparangarangmo ti natan-ok nga ayatmo ken ni adipenmo a David nga amak, gapu ta napudno kenka, naimbag ken nalinteg a tao. Intultuloymo nga imparangarang kenkuana ti natan-ok ken di agbalbaliw nga ayatmo. Pinaraburam iti anak a madama ita nga agturay iti lugarna.

7 OApoa Dios, insaadnak nga ari a kas sukat daydi amak uray no ubingak unay ket awan pay ammok maipapan iti panagturay.

8 Addaak iti sidong dagiti pinilim a tattaom, isuda a saan a mabilang ti kaaduda.

9 Ikkannak ngarud iti sirib a kasapulak tapno nalinteg ti panangiturayko kadagiti tattaom ken tapno ammok a paggiddiaten ti dakes ken naimbag. No dinak ikkan, kasano a kabaelak ti mangituray kadagiti nakaad-adu a tattaom?”

10 Naragsakan ni Yahweh ta daytoy ti dinawat ni Solomon

11 ket kinunana kenkuana, “Agsipud ta kinasirib a mangituray a sililinteg ti dinawatmo a saan ketdi a ti atiddog a panagbiag wenno kinabaknang wenno ti biag dagiti kabusormo,

12 itedko ti dinawatmo. Paraburanka iti kinasirib ken pannakaawat. Awanen ti masirsirib ngem sika ket awanto metten ti tumaud a masirsirib.

13 Itedko pay kenka ti saanmo a dinawat! Iti urnos ti panagbiagmo, ikkanka iti sanikua ken dayaw a saan a maartapan ti siasinoman nga ari.

14 No agtulnogka kaniak a kas iti daydi amam a David ket tungpalem dagiti linteg ken bilinko, ikkanka iti atiddog a panagbiag.”

15 Nakariing ni Solomon ket nabigbigna a nagsao kenkuana ti Dios iti maysa a tagtagainep. Idi nagsubli idiay Jerusalem, napan iti sangoanan ti Lakasa ti Tulag ni Yahweh ket nagidatag kadagiti daton a mapuoran ken daton a pakikappia. Kalpasanna, pinadayaanna dagiti amin nga ofisialesna.

Risuten ni Solomon ti Maysa a Parikut

16 Naminsan, adda dua a balangkantis a babbai a napan dimmatag ken ni Ari Solomon.

17 Kinuna ti maysa kadakuada, “Natan-ok nga Ari, kaduak daytoy a babai nga agnaed iti maymaysa a balay. Adda idi agpasngayak iti maladaga a lalaki.

18 Tallo nga aldaw kalpasan ti panagpasngayko, nangipasngay met iti lalaki. Dakdakami laeng a dua ti adda iti balay.

19 Iti maysa a rabii, naaddaganna ti anakna ket natay ti ubing.

20 Bimmangon iti dayta met la a rabii ket immayna innala ti anakko sana impan iti iddana. Insukatna ti natay nga anakna iti sibibiag nga anakko.

21 Kabigatanna, idi makariingak ket pasusoek koma ti anakko, nakitak a natay met gayam. Ngem idi miningmingak a nalaing, nabigbigko a saan nga isu ti anakko.”

22 “Saan nga agpayso dayta!” insungbat ti sabali a babai. “Anakko ti sibibiag. Anakmo ti natay!”

Kinuna ti umuna a babai, “Saan! Anakmo ti natay. Siak ti akin-anak iti sibibiag!”

Ket kastoy ti panagsinnuppiatda iti sangoanan ti ari.

23 Kinuna ni Ari Solomon, “Agpadpadakayo nga agkuna nga anakna ti sibibiag a maladaga. Ngem awan ti mangannugot nga anakna ti natay.”

24 Nagpaala ti ari iti kampilan. Idi mayeg ti kampilan,

25 imbilinna a magudua ti maladaga; maited ti kagudua iti maysa a babai ket ti maysa a kagudua iti sabali.

26 Gapu iti ayat ti pudno nga ina iti anakna, kinunana iti ari, “Natan-ok nga Ari, pangngaasim ta dimo papatayen ti ubing! Itedmo laengen kenkuana!”

Ngem kinuna ti maysa, “Dimo ited ti ubing iti uray siasino kadakami. Sige, guduaem.”

27 Kinuna ngarud ti ari, “Diyo patayen ti maladaga! Itedyo iti immuna a babai—isu ti pudpudno nga inana.”

28 Idi madamag dagiti Israelita ti pangngeddeng ti ari, napalalo ti panagraemda kenkuana ta nabigbigda nga inikkan ti Dios iti sirib a mangrisut kadagiti darum nga awan idumdumana.