Paimbagen ni Jesus ti Tao a Nayanak a Bulsek

1 Bayat ti pannagna ni Jesus, nakitana ti maysa a lalaki a bulsek manipud pannakayanakna.

2 Sinaludsod kenkuana dagiti adalanna, “Maestro, siasino ti akimbasol iti pannakayanak a bulsek daytoy a tao? Basolna kadi wenno basol dagiti nagannak kenkuana?”

3 “Awan ti pakainaigan ti kinabulsek daytoy a tao iti basolna wenno iti basol dagiti nagannak kenkuana,” insungbat ni Jesus. “Bulsek daytoy tapno makita kenkuana ti pannakabalin ti Dios.

4 Masapul nga aramidentayo dagiti ipaaramid ti nangibaon kaniak ta aldaw pay. Dumteng ti rabii ket awan ti makatrabaho.

5 Bayatti kaaddak ditoy lubong, siak ti silaw ti lubong.”

6 Idi naisaon ni Jesus daytoy, timmupra iti daga. Inggamayna ti tuprana iti tapok ket inyaprosna iti mata ti bulsek

7 sana kinuna kenkuana, “Inka agdiram-os idiay pagdidigosan ti Siloe.” (“Naibaon” ti kayat a sawen ti Siloe.)

Napan ngarud ti bulsek ket nagdiram-os. Idi agsubli, makakitan.

8 Idi makita dagiti kaarrubana ken dagiti tattao a makaam-ammo kenkuana a maysa a makilimlimos idi, kinunada, “Saan kadi a daytoy ti tao a masansan nga agtugaw ditoy a makilimlimos?”

9 “Wen, isu!” kinuna ti dadduma.

“Saan nga isu,” kinuna met dagiti dadduma. “Kaing-ingasna laeng!”

Iti kasta, mismo a ti lalaki ti nagkuna, “Wen, pudno a siak daydi makilimlimos.”

10 Kinunada kenkuana, “Ngem apay a makakitaka metten?”

11 “Inggamay ti maysa a tao nga agnagan Jesus ti tuprana iti tapok sana inyapros kadagiti matak,” insungbat ti lalaki. “Kalpasanna, imbaonnak a mapan agdiram-os idiay Siloe. Napanak ngarud, ket apaman a nakadiram-osak, makakitaak metten!”

12 “Sadino ti ayan ti nangpaimbag kenka?” sinaludsodda.

“Diak ammo,” insungbatna.

Palutpoten dagiti Fariseo ti Pannakapaimbag ti Bulsek

13 Kalpasanna, impanda ti naimbagan a bulsek iti ayan dagiti Fariseo.

14 Aldaw a Panaginana idi nanggamay ni Jesus iti pitak a pinangagasna kadagiti mata ti bulsek.

15 Ngarud, sinaludsod met dagiti Fariseo no kasano a napaimbag dagiti matana.

“Inaprosanna dagiti matak iti pitak, nagdiram-osak, ket ita makakitaakon,” kinunana kadakuada.

16 Kinuna ti sumagmamano a Fariseo, “Saan a naggapu iti Dios ti tao a nangaramid iti daytoy, agsipud ta dina annuroten ti paglintegan iti Aldaw a Panaginana.”

Kinuna met ti dadduma, “Kasano ti pannakabalin ti maysa a managbasol nga agaramid kadagiti kakasta a nakaskasdaaw a pagilasinan?”

Agsusupadi ti pampanunotda.

17 Iti kasta, pinalutpot manen dagiti Fariseo ti lalaki. “Kunam a pinaimbagna dagiti matam. Ania ti masaom maipapan kenkuana?”

“Maysa a profeta,” insungbatna.

18 Nupay kasta, saan a patien dagiti Judio a bulsek idi daytoy a tao, ket ita, makakitan. Isut’ gapuna nga inayabanda dagiti nagannak kenkuana.

19 “Anakyo kadi daytoy?” sinaludsodda. “Kunayo a nayanak a bulsek. Apay ngarud a makakitan?”

20 “Wen, anakmi daytoy,” insungbat dagiti nagannak. “Ammomi a nayanak a bulsek.

21 Ngem saanmi nga ammo no kasano a makakitan. Saanmi met nga ammo no siasino ti nangpaimbag kenkuana. Isu ti pagsaludsodanyo ta nataengan metten. Ammona ti isungsungbatna!”

22 Sinao dagiti nagannak daytoy agsipud ta mabutengda kadagiti papangulo a Judio a nanganamongen a mapagtalaw iti sinagoga ti siasinoman a mangibaga a mamati a ni Jesus isu ti Cristo.

23 Dayta ti gapuna a kinuna dagiti nagannak, “Nataenganen; isu ti pagsaludsodanyo!”

24 Inayabanda manen ti tao a nayanak a bulsek ket kinunada kenkuana, “Ikarim iti sangoanan ti Dios nga ibagam ti pudno! Ammomi a managbasol dayta a tao!”

25 “Diak ammo no managbasol wenno saan,” insungbat ti napaimbag. “Daytoy ti ammok: Bulsekak idi, ngem ita, makakitaakon!”

26 “Ania ti inaramidna kenka?” sinaludsodda. “Kasano ti panangpaimbagna kadagita matam?”

27 “Imbagak la ngaruden kadakayo, ngem didak met patien,” insungbatna. “Apay a kayatyo manen a denggen? Kayatyo met kadi ti agbalin nga adalanna?”

28 Nagsasawanda ket kinunada, “Sika ti adalanna, ket dakami ti adalan ni Moises.

29 Ammomi a nagsao ti Dios ken ni Moises. Ngem no maipapan iti dayta a tao, dimi pay ammo ti naggapuanna!”

30 “Nakaskasdaaw unay daytoy!” insungbatna. “Saanyo nga ammo ti naggapuanna, ngem pinaimbagnak!

31 Ammotayo a saan nga ipangag ti Dios dagiti managbasol, ngem ipangagna dagiti tattao nga agdayaw kenkuana ken agaramid iti pagayatanna.

32 Manipud pannakaparsua ti lubong, awan pay nadamag a nanglukat kadagiti mata ti tao a nayanak a bulsek.

33 Awan ti mabalin nga aramiden dayta a tao no saan a naggapu iti Dios.”

34 “Nayanak ken dimmakkelka iti basol, dakam ket ti isuromon?” insungbatda kenkuana ket pinagtalawda iti sinagoga.

Ti Naespirituan a Kinabulsek

35 Nadamag ni Jesus ti napasamak. Sinapulna ti bulsek ket idi agsarakda, kinunana kenkuana, “Mamatika kadi iti Anak ti Tao?”

36 “Ibagam kaniak, apo, no siasino tapno mamatiak kenkuana!” insungbat ti lalaki.

37 “Nakitamon,” kinuna ni Jesus. “Isu ti kasasaom.”

38 “Mamatiak, Apo!” kinuna ti tao, ket nagparintumeng a nagdaydayaw ken ni Jesus.

39 Kinuna ni Jesus, “Immayak mangukom ditoy lubong tapno makakita dagiti bulsek, ket agbulsek dagiti makakita.”

40 Nangngeg ti sumagmamano a Fariseo a naitallaong sadiay ti kinuna ni Jesus, ket sinaludsodda kenkuana, “Ibagbagam kadi a bulsekkami met?”

41 “No bulsekkayo, awan koma ti pakabasolanyo,” insungbat ni Jesus. “Ngem gapu ta kunayo met a makakitakayo, kayatna a sawen nga adda latta basolyo.”