1 “Daytoy ti kanibusanan dagiti didiosen ti Babilonia!

Nagdaydayawan idi dagiti tattao dagiti didiosen a Bel ken Nebo.

Ngem ita, naikargada kadagiti asno,

ket dadagsen ida dagiti nabannog nga animal!

2 Daytoy ti kanibusanan dagiti didiosen ti Babilonia.

Saan a maisalakan dagiti imahen ti mismo a bagbagida,

naagaw ken naitalawda.

3 “Denggendak, dakay a kaputotan ni Jacob,

dakay amin a natda kadagiti tattaok.

Inay-aywanankayo manipud pannakayanakyo.

4 Siak ti Diosyo ket aywanankayto

agingga a duduogankayo.

Pinarsuakayo ket aywanankayto;

tulongan ken ikanawakayto.

5 “Siasino ti pangidiliganyo kaniak,” kuna ni Yahweh.

“Adda aya sabali a kapadak?

6 Luktan dagiti tattao dagiti supotda

ket ibukbokda dagiti balitok;

timbangenda dagiti pirak.

Manangdanda iti platero nga agaramid

iti didiosen a pagrukbaban ken pagdaydayawanda.

7 Baklayen ken awitenda;

isaadda iti nairanta a pagyananna,

ket adda sadiay, di makagaraw iti lugarna.

No adda agkararag kenkuana dina masungbatan,

ket no dumteng ti didigra dina met maisalakan.

8 “Laglagipenyo daytoy, dakayo a managbasol;

panunotenyo a naimbag dagiti inaramidko.

9 Laglagipenyo dagiti napasamak idi un-unana;

bigbigenyo a siak laeng ti Dios,

ket awan ti sabali a kas kaniak.

10 Manipud idi punganay, ti maaramid innak impadto;

nabayagen nga imbagak ti mapasamakto.

Impakaammok a matungpalto a matungpal dagiti panggepko.

11 Mangayabak iti kali nga aggapu iti Daya;

sumippayotto a kas maysa a sawi,

ket aramidenna ti pinanggepko.

Nasaokon ket maaramidto.

12 “Denggendak, dakay a nasukir a tattao,

dakay a mangipagarup nga adayo pay ti balligi.

13 Yasidegko ti aldaw ti panagballigi—

saan unayen a mabayag.

Saanto a mataktak ti panagballigik;

isalakankonto ti Jerusalem,

ket itedkonto ti dayaw ti Israel sadiay.”