Dagiti Dua a Patakder iti Asideg ti Templo

1 Inkuyognak ti lalaki a napan iti akinruar a paraangan ket nagtuloykam iti maysa a patakder iti akin-amianan a paset ti Templo iti saan nga adayo iti patakder nga adda iti akinlaud a pungto ti Templo.

2 Agatiddog daytoy a patakder iti 168 a kadapan ken 84 a kadapan ti kaakabana.

3 Iti maysa a bangir, sumango iti bakante a lugar nga agrukod iti 34 a kadapan iti abay ti Templo. Iti maysa a bangir, sumango iti dalan iti akinruar a paraangan. Naaramid a tallo a katukad ti patakder, tunggal maysa naisanud ti pannakaipasdekna iti nakaituonanda.

4 Adda dalan a 16 a kadapan ti kaakabana ken 168 a kadapan ti kaatiddogna iti akin-amianan a bangir. Adda dagiti pagserkan iti dayta a bangir.

5 Ak-akikid dagiti akingngato a kuarto ngem dagiti akimbaba ken akintengnga a kuarto agsipud ta naipasanudda.

6 Dagiti kuarto kadagiti tallo a katukad, natukantukadda ket awan ti adigida a kas kadagiti patakder iti paraangan.

7-8 Iti akimbaba a kadsaaran, iti akinruar a diding ti patakder, buhos ti 84 a kadapan ti kaatiddogna ket adda kukuarto ti nabati nga 84 a kadapan. Iti akingngato a kadsaaran, adda kukuarto iti entero a kaatiddog ti patakder.

9-10 Iti akindaya a pungto ti patakder a pangrugian ti diding,adda dagiti ridaw nga agturong iti akinruar a paraangan.

Iti abagatana paset ti Templo, adda umasping a patakder a saan nga adayo iti patakder nga adda iti akinlaud a pungto ti Templo.

11 Adda dalan iti sangoanan dagiti kuarto a kas iti dalan nga adda iti bangirna ti amianan. Pumada ti rukod ti pannakaaramid ken ti kita dagiti pagserkanna.

12 Adda ridaw ti babaen dagiti kuarto iti bangirna ti abagatan ti patakder, iti akindaya a pungto a pangrugian ti diding.

13 Kinuna ti lalaki kaniak, “Nasantoan dagitoy dua a patakder a panganan dagiti papadi kadagiti kasantoan a daton no dumatagda iti sangoanan tiApo. Gapu ta nasantoan dagiti kuarto, ikabil dagiti papadi dagiti kasantoan a sagut sadiay: dagiti daton a makan, daton a pakapakawanan ti basol wenno daton gapu iti basol.

14 No rummuar dagiti papadi iti Templo, ket kayatda ti mapan iti akinruar a paraangan, masapul nga ibatida kadagitoy a kuarto dagiti nasantoan a pagan-anay nga inusarda bayat ti panagserbida itiApo. Agkawesdanto kadagiti sabali a pagan-anay sakbay a rummuarda iti paguummongan dagiti tattao.”

Ti Rukod ti Masakupan ti Templo

15 Idi narukoden ti lalaki ti uneg ti Templo, rimmuarkami iti pagserkan a sumango iti daya sana rinukod ti ruar ti Templo.

16-19 Iti bangirna ti daya, agrukod iti 840 a kadapan; kastoy met ti rukod iti bangirna ti amianan, abagatan ken laud ti Templo.

20 Iti kasta, sakupen ti bakud ti 840 a kadapan a kuadrado. Agserbi ti bakud a kas baet ti nasantoan a lugar ken ti saan a nasantoan.