Mayarig ti Egipto iti Kayo a Sedro
1 Iti umuna nga aldaw iti maikatlo a bulan iti maika-11 a tawen a pannakaitalawmi, nagsao tiApokaniak.
2 Kinunana, “Anak ti tao, ibagam daytoy iti ari ti Egipto ken kadagiti amin a tattaona:
‘Anian a bilegmo!
Ania ti pangyarigak kenka?
3 Kaskalaiti sedro ti Libano,
narangpaya ken narukbos dagiti sangana.
Dumanon kadagiti ulep ti aringgawisna.
4 Adda danum a nangpadakkel
ket adda ubbog a nangsibog.
Pinadanumanda ti nagtuboanna
ket pinasayakanda amin a kayo ti bakir.
5 Gapu ta nasayaat ti pannakasibogna,
dimmakkel a nataytayag ngem ti amin a kayo.
Rimmangpaya ken rimmukbos dagiti sangana.
6 Nagumok ti amin a kita ti tumatayab kadagiti sangana.
Naganak dagiti atap nga animal iti sirokna.
Naginana dagiti nasion iti linongna.
7 Nagpintasen dayta a kayo,
nakataytayag ken nakaat-atiddog dagiti sangana.
Nakadanon dagiti ramutna
iti ubbog nga agay-ayus iti uneg ti daga.
8 Awanti sedro iti hardin ti Dios
nga umasping kenkuana.
Awan saleng a kasta ti sangana,
awan met sikamoro a kasta ti santakna.
Awan ti kayo iti hardin ti Dios
a kasta ti pintasna.
9 Pinapintasko babaen kadagiti narangpaya a sangsanga.
Ap-apalan ti amin a kayo idiay Eden a hardin ti Dios!’
10 “Ita ngarud, siak nga Apo aDios, ibagak kenka ti mapasamak iti dayta a kayo a dimmakkel agingga a dimmanon kadagiti ulep. Timmangsit ti kayo bayat ti panagdakkelna,
11 isu a linaksidko ket bay-ak nga iturayan ti maysa a ganggannaet. Ipalak-amnanto ti maitutop iti kinadakesna.
12 Pukanen ken baybay-anto dagiti naranggas a ganggannaet. Maiwarawaranto dagiti natukkol a sangsangana iti amin a bantay ken tanap iti away. Pumanawto dagiti amin a nasion a nagnanaed iti linongna.
13 Umayto dagiti tumatayab ket agbatayda iti natuang a kayo. Baddebaddekento dagiti atap nga animal dagiti sangana.
14 Isut’ gapuna a manipud ita, awanen ti kayo a, nupay kasano ti sayaat ti pannakapadanumna, dumakkel a natayag wenno dumanon ti rawisna kadagiti ulep ket magtengna ti kasta a katayag. Naikeddengda amin a matay a kas iti tao; wen, naikeddengda a tumipon kadagiti agpababa iti lubong dagiti natay.”
15 Kuna ti Apo aDios, “Iti aldaw a maitinnag ti kayo iti lubong dagiti natay, bay-akto a lumned iti danum iti uneg ti daga kas mangipakita iti panagladingit. Pasardengekto ti ayus dagiti karayan tapno malapdan ti nabuslon a danum nga agturong iti rabaw ti daga. Gapu iti ipapatay ti kayo, pagsipngetekto ti Bantay Libano ket magangonto amin a kayo ti bakir.
16 Inton itinnagko ti kayo iti lubong dagiti natay, agkintayegto dagiti nasion iti kanarpaak ti pannakatuangna. Gapu iti daytoy, maragsakanto amin a kayo ti Eden, amin a napili ken nasayaat ti pannakapadanumna a kayo ti Libano nga adda iti akimbaba a lubong.
17 Agkukuyogdanto a mapan iti lubong dagiti natay tapno tumiponda kadagiti immuna a napapatay. Ket maiwarawara kadagiti pagilian dagiti amin a nagnaed iti linongna.
18 “Ti kayo isu ti ari ti Egipto ken dagiti amin a tattaona. Uray dagiti kayo ti Eden awan ti kas kenkuana a natayag ken nadaeg. Ngem ita, kas kadagiti kayo ti Eden, maitappuakto met iti lubong dagiti natay ket tumipon kadagiti awan diosna ken kadagiti natay iti gubat. Naibagakon,” kuna ti Apo aDios.