1 Laglagipem ti Namarsua kenka ita ta agtutuboka pay sakbay a dumteng dagiti dakes nga aldaw ken tawen a panagkunam, “Awan ragsakko iti biag.”

2 Mapasamak daytoy inton agsipnget iti imatangmo ti init, ti bulan ken dagiti bituen ket dinto umadayo dagiti ulep a mangyeg iti tudo.

3 Kalpasanna, agtigergerto dagiti takkiagmo a nangsalsalaknib kenka, ket agkutukotto dagiti natibker a tumengmo. Dimonto mangalngal ti taraonmo agsipud ta agtuppolkanton. Kumudrepto metten dagiti matam.

4 Dimonton mangngeg dagiti ariwawa iti kalsada. Narigatmonton a maallingag ti uni ti gilingan, kasta met ti aweng ti musika, ngem uray ti kanta ti billit riingennakanto.

5 Mabutengkanto kadagiti nangato a disso ket napeggadto ti pannagnam. Agubankanto; awanton ti essemmo a makikaidda ket mapukawmonton ti amin a tarigagaymo.

Agturturongtayo iti agnanayon a paginanaantayo ket addanto panagdung-aw kadagiti kalsada.

6 Mapekkanto ti pirak a kawar ket matnagto ti balitok a pagsilawan a puon ti pakaburakanna. Mapugsatto ti tali iti bubon ket maburburakto ti karamba.

7 Agsublinton ti bagitayo iti tapok ti daga ket agsubli ti anges ti biag iti Dios a naggapuanna.

8 Awan serserbi ti amin a banag, kinuna ti Mannursuro. Awan serserbina.

Ti Paggibusan

9 Gapu ta adu ti ammo ti Mannursuro, imbingayna ti ammona kadagiti tattao. Inadalna dagiti pagsasao ket impasnekna a sinuot ti kinapudnoda.

10 Pinadas ti Mannursuro ti nagbirok kadagiti makaliwliwa a sao ngem nagubbog iti pusona dagiti balikas nga insuratna.

11 Mayarig dagiti pagsasao dagiti masirib kadagiti natirad a kayo a pagabog dagiti agpaspastor kadagiti karnero. Inted ti Dios ti kakaisuna a Pastortayo amin.

12 Anakko, adda maysa a banag a siputam. Awan gibus ti panagsurat kadagiti libro ket mapaksuyanka no palaloam ti agadal.

13 Kalpasan amin dagitoy, maymaysa laeng ti mabalin a sawen: Agbuteng ken agdaydayawka iti Dios ket tungpalem dagiti bilbilinna ta daytoy ti pakabuklan ti pagrebbengan ti tao.

14 Ukomento ti Dios dagiti amin nga aramidtayo, naimbag man wenno dakes, uray pay dagiti naaramid iti nalimed.