Panangidayaw iti Templo

1 OApo, lagipem kadi ni David,

ken ti amin a sinagabana.

2 Lagipem met, OApo, ti inkarina,

ti kari a sinapataanna kenka,

a Mannakabalin a Dios ni Jacob:

3 “Saanakto nga agawid wenno mapan iti iddak;

4 saanak nga aginana, diak ikidem dagiti matak,

5 agingga a maipaayak iti lugar tiApo,

iti pagnaedan ti Mannakabalin a Dios ni Jacob.”

6 ItiEfrata,nadamagmi ti maipapan iti Lakasa ti Tulag,

ket nasarakanmi kadagiti tantanap ti Jearim.

7 Kinunami, “Intayo iti balay tiApo,

agdaydayawtayo iti sakaanan ti tronona!”

8 Umayka iti Templo, OApo,

agraman ti Lakasa a simbolo ti bilegmo

ket agyanka ditoy iti agnanayon awan inggana.

9 Aramiden koma dagiti papadim ti rumbeng ken umno;

agdir-i koma iti rag-o dagiti bukodmo a tattao.

10 OApo, nagkarika idi ken ni David nga adipenmo;

dimo kadi laksiden ti pinilim nga ari.

11 Sinapataamti karim ken ni David,

ket saanmonto a paglikudan:

“Isaadkonto nga ari ti maysa kadagiti annakmo,

ket sumarunonto kenka nga agtugaw iti trono.

12 No napudno dagiti annakmo iti tulagko

ken dagiti ibilinko kadakuada,

agarinto met a kas kenka iti agnanayon dagiti sumarsaruno a kaputotanda.”

13 Pinili ni Yahweh ti Sion;

kayatna a sadiay ti pagnaedanna:

14 “Ditoyto ti pagyanak iti agnanayon;

ditoyto ti kayatko a pagturayan.

15 Itedkonto iti Sion ti amin a kasapulanna;

ikkakto dagiti napanglaw nga agnaed kenkuana

iti taraon agingga a mapnekda.

16 Bendisionakto dagiti papadina iti amin nga aramidda;

idir-into dagiti tattaona ti ragsakda.

17 Ditoy,patuboekto ti maysa a saranga agpaay ken ni David;

nangisaganaak iti pagsilawan a maipaay iti pinilik.

18 Lemmesekto iti bain dagiti kabusorna,

ngem rumang-ayto ti pagarianna.”