Kararag a Pangsaranget iti Kabusor

1 Sisasaganaak,

O Dios, wen, sisasaganaak!

Agkantaakto ket agdaydayawak kenka.

O kararuak, agriingka!

2 Agriingkayo, lirak ken arpak,

ket riingek ti bannawag.

3 Agyamanak kenka, OApo,

iti imatang dagiti pagilian.

Ikantakto ti pagdaydayaw kenka

iti imatang sabali a tattao.

4 Ringbawan ti di agbalbaliw nga ayatmo ti langit;

dumanon iti tangatang ti kinapudnom.

5 Iparangmo sadi langit, O Dios, ti tan-okmo,

ken iti entero a daga, ti dayagmo.

6 Isalakannakami babaen iti bilegmo ket dumngegka iti kararagko

tapno maispal dagiti ay-ayatem a tattao.

7 Kinuna ti Dios manipud iti santuariona,

“Bingbingayekto ti Sikem inton agballigiak,

ket ti tanap ti Succot innakto iwaras.

8 Kukuak ti Galaad ken ti Manases;

ti Efraim ti helmetko,

ket ti Juda ti bukodko a setro.

9 Ngem aramatekto ti Moab a pagbuggoak;

ipurruakkonto ti sandaliasko iti Edom,

ket iti Filistia umkisakto iti panagballigik.”

10 Siasinonto, O Dios,

ti manguyog kaniak iti nasarikedkedan a siudad?

Siasinonto ti mangipan kaniak idiay Edom?

11 Pudno aya a binaybay-annakamin?

A dikanton kumuyog kadagiti armadami?

12 Tulongannakami a sumaranget kadagiti kabusormi,

ta awan serserbi ti maitulong ti tao kadakami.

13 Agballigikamto babaen iti tulong ti Dios;

parmekennanto dagiti kabusormi.