Ni Pablo idiay Corinto

1 Kalpasan daytoy, pimmanaw ni Pablo idiay Atenas ket nagturong idiay Corinto.

2 Nasarakanna sadiay ti maysa a Judio nga agnagan Akila a nayanak idiay Ponto. Kagapgapu ni Akila idiay Italia agraman ni Priscila nga asawana agsipud ta pinapanaw ni Emperador Claudio dagiti amin a Judio idiay Roma. Sinarungkaran ni Pablo ida

3 ket nakipagnaed ken nakipagtrabaho kadakuada iti panagaramid iti tolda, ta agpapadada iti pagsapulan.

4 Iti tunggal Aldaw a Panaginana, nakilinnawag idiay sinagoga, ket inkagumaanna a maallukoy a mamati dagiti Judio ken Griego.

5 Idi sumangpet da Silas ken Timoteo a naggapu idiay Macedonia, impamaysa ni Pablo ti panangaskasabana ket nangted kadagiti pammaneknek kadagiti Judio a ni Jesus isu ti Cristo.

6 Ngem idi supringen ken pagsasawanda, winagwagna ti tapok iti pagan-anayna ket kinunana: “No saankayo a maisalakan, dakayo ti akimbasol, saan a siak. Manipud ita, panawankayon ket innak mangasaba kadagiti Hentil.”

7 Pinanawanna ida ket napan nakipagtaeng iti balay ti maysa a Hentil nga agnagan Ticio Justo a managdaydayaw iti Dios. Adda ti balayna iti abay ti sinagoga.

8 Namati met iti Apo ni Crispo a pangulo ti sinagoga agraman ti familiana. Adu pay ti namati ken nabuniagan kadagiti taga-Corinto a nakangngeg iti inkasaba ni Pablo.

9 Iti maysa a rabii, adda parmata ni Pablo. Kinuna ti Apo kenkuana: “Dika agbuteng. Ituloymo latta ti agsao ket dika maupay,

10 ta addaak kenka. Awanto ti mangranggas kenka, agsipud ta adu ti taok iti daytoy a siudad.”

11 Maysa ket gudua a tawen a nagyan ni Pablo idiay Corinto a nangisursuro kadagiti tattao iti maipapan iti sao ti Dios.

12 Idi maisaad ni Galion a gobernador iti Acaya, nagtataripnong dagiti Judio, tiniliwda ni Pablo sada insaklang iti pangukoman.

13 “Guyguyugoyen daytoy a lalaki dagiti tattao tapno agdaydayawda iti Dios iti wagas a maikontra iti lintegmi!” kinunada.

14 Ngem idi agsao koma ni Pablo, kinuna ni Galion kadagiti Judio: “No maipanggep iti panagsalungasing wenno dakes nga aramid, adda koma karbengak a dumngeg kadakayo.

15 Ngem yantangay ta daytoy ket maysa laeng a suppiat maipapan kadagiti sao ken nagnagan, ken iti linteg a mayaplikar la kadakayo, dakayo ti mangrisut. Saan a siak ti mangeddeng no ania ti dakes ken no ania ti naimbag.”

16 Ket pinapanawna ida iti pangukoman.

17 Tiniliwda ngarud ni Sostenes a pangulo ti sinagoga sada kinabkabil iti sangoanan ti pangukoman, ngem saan nga inkaskaso ni Galion.

Agsubli ni Pablo idiay Antiokia

18 Nakipagtaengni Pablo kadagiti kakabsat idiay Corinto. Kalpasan ti adu nga aldaw, nagbarko a kaduana da Priscila ken Akila a nagturong idiay Siria. Sakbay a naglayagda manipud Cencrea, nagpakalbo ni Pablo ta adda kari a sinapataanna.

19 Dimtengda idiay Efeso a nangibatian ni Pablo kada Priscila ken Akila. Simrek iti sinagoga ket nakisinnuppiat kadagiti Judio.

20 Indawatda kenkuana nga agbayag koma sadiay, ngem saan nga immannugot.

21 Ngem idi agpakada kadakuada, kinunana, “No ipalubos ti Dios, agsubliakto kadakayo.”

Naglugan iti barko ket nagluas manipud Efeso.

22 Apaman a simmangpet idiay Cesarea, simmang-at idiay Jerusalem ket kinablaawanna ti iglesia sa naglayon idiay Antiokia.

23 Pimmanaw manen kalpasan iti panagyanna sadiay iti sumagmamano nga aldaw. Nagsubli idiay Galacia ken Frigia. Sinursorna dagitoy a luglugar ket pinapigsana ti pakinakem dagiti amin a mamati.

Mangasaba ni Apolos idiay Efeso

24 Dimteng idiay Efeso ti maysa a Judio a nayanak idiay Alejandria. Apolos ti naganna. Nalaing nga agbitla ken adu ti ammona maipapan kadagiti Nasantoan a Sursurat.

25 Nasursuroan iti Dalan ti Apo. Sigaganetget a nagsao ket awan pagkurangan ti panangisurona iti maipapan ken ni Jesus. Nupay kasta, ti laeng panamuniag ni Juan ti ammona.

26 Situtured a nagsao idiay sinagoga. Idi mangngeg da Priscila ken Akila, inawisda ni Apolos iti balayda ket inlawlawagda a naimbag kenkuana ti Dalan ti Dios.

27 Inkeddeng ni Apolos ti mapan idiay Acaya. Tinulongan dagiti mamati idiay Efeso ket nagsuratda kadagiti kakabsat idiay Acaya tapno awatenda ni Apolos. Idi addan sadiay, dakkel ti naitulongna kadagiti nagbalin a mamati babaen iti parabur ti Dios.

28 Ta sibibileg a nakidebate kadagiti Judio iti plasa ket inabakna ida. Babaen kadagiti Nasantoan a Sursurat, pinaneknekanna a ni Jesus isu ti Cristo.